ویب ڈیسک: کراچی میں آج سے درجہ حرارت میں کمی کا امکان ظاہر کیا گیا ہے جبکہ شہر کے چند مقامات پر بوندا باندی کا امکان بھی ہے۔
تفصیلات کے مطابق محکمہ موسمیات کا کہنا ہے کہ آئندہ 24 گھنٹوں کے دوران شہر قائد میں موسم گرم اور مرطوب رہنے کا امکان ہے، زیادہ سے زیادہ درجہ حرارت 35 سے37 ڈگری سینٹی گریڈ تک جا سکتا ہے۔
محکمہ موسمیات کا کہنا ہے کہ ہوا میں نمی کا تناسب 75 فیصد ہے اور مغرب سے 16کلومیٹر فی گھنٹہ کی رفتار سے ہوائیں چل رہی ہیں۔
ادھر گلگت بلتستان، شمالی بلوچستان اور بالائی خیبرپختونخوا میں آج کہیں کہیں بارش متوقع ہے۔
مزید برآں محکمہ موسمیات کے مطابق جون کے دوسرے ہفتے سے پری مون سون کا آغاز ہوگا جس کے سبب بالائی اور شمالی علاقوں میں بارش کا اسپیل بھی درجہ حرارت میں کمی لائے گا۔
دوسری جانب نجی موسمیاتی ادارے کا بتانا ہے کہ پیر سے ہفتے کے درمیان کراچی میں تیز سمندری ہوائیں چلتی رہیں گی، پیر سے ہفتے کے درمیان کراچی میں مطلع جزوی ابر آلود رہے گا اور ہوائیں 30 سے 40 کلومیٹر فی گھنٹہ کی رفتار چلتی رہیں گی۔
پیر تا ہفتہ کراچی کا درجہ حرارت 33 سے 35 ڈگری سینٹی گریڈ کے درمیان رہے گا، ہوا میں نمی کا تناسب زیادہ ہونے کی وجہ سے درجہ حرارت زیادہ محسوس ہو سکتا ہے۔
ادارے کے مطابق سمندری بادلوں کے باعث چند مقامات پر رات گئے بوندا باندی بھی ہو سکتی ہے۔