ویب ڈیسک: لاہور الیکٹرک سپلائی کمپنی ( لیسکو) نے صارفین کی بجلی کے بلوں تک رسائی کے لیے آن لائن سروس متعارف کروادی۔
تفصیلات کےمطابق لاہور، شیخوپورہ، قصور، اوکاڑہ اور ننکانہ صاحب سمیت پنجاب کے پانچ اضلاع میں 4.5 ملین سے زائد صارفین کو خدمات فراہم کرنے والے ادارے لیسکو نے بجلی کے بلوں تک آسان رسائی کی سہولت کے لیے یہ اقدام شروع کیا ہے۔
اب آن لائن سروس کے آغاز کے بعد صارفین اب اپنے بجلی کے بل کی کاپی ڈاؤن لوڈ کرنے کے لیے لیسکو کی سرکاری ویب سائٹ پر جا سکتے ہیں،آن لائن ڈپلیکیٹ بل حاصل کرنے کے لیے صارفین کو اپنا حوالہ نمبر درج کرنا ہوگا، جو ان کے بیچ نمبر، سب ڈویژن نمبر، حوالہ نمبر، اور ’آر‘ یا ’یو‘ کوڈ کا مجموعہ ہے۔
علاوہ ازیں متبادل طور پر وہ اپنی کسٹمر آئی ڈی درج کرکے بھی بل دیکھ سکتے ہیں،آن لائن سروس اگست 2024 اور اس کے بعد کے بلوں تک رسائی کے لیے صارفین کو دستیاب ہوگی۔
واضح رہے کہ اس سے قبل لیسکو ہر ماہ بجلی کے بلوں کی پرنٹ شدہ کاپیاں صارفین کو گھر کی دہلیز پر بھیجتا تھا۔