'میاں محمد نواز شریف جلد وطن واپس آئیں گے'

سیالکوٹ: وفاقی وزیر دفاع خواجہ محمد آصف نے ایک بیان میں کہا ہے کہ سابق وزیر اعظم اور مسلم لیگ ن کے قائد میاں محمد نواز شریف جلد وطن واپس آئیں گے۔ سیالکوٹ میں شہابپورہ فلائی اوور کا افتتاح کرتے ہوئے وزیر دفاع خواجہ آصف نے کہا کہ شہابپورہ فلائی اوور پاکستان مسلم لیگ (ن) کی جانب سے بڑی عید پر سیالکوٹ والوں کے لیے ایک بڑا تحفہ ہے، سیالکوٹ شہابپورہ فلائی اوور کی تکمیل پر میں متعلقہ تمام اداروں اور مقامی حکام کا شکرگزار ہوں جن کی انتھک محنت سے آج یہ فلائی اوور مکمل ہوا ہے۔ خواجہ آصف نے کہا کہ پاکستان مسلم لیگ (ن) کی حکومت نے یہ منصوبہ شروع کیا اور آج پاکستان مسلم لیگ (ن) ہی اس منصوبے کو مکمل کر رہی ہے، ماضی کی پاکستان تحریک انصاف کی حکومت نے اپنے چار سالہ دور اقتدار میں ایک اینٹ تک بھی نہیں لگائی لیکن وزیراعظم محمد شہباز شریف اور وزیراعلیٰ پنجاب محمد حمزہ شہباز شریف کی خصوصی دلچسپی سے گزشتہ4سال سے التوا میں پڑا یہ منصوبہ آج پایہ تکمیل کو پہنچا ہے۔ ان کا کہنا تھا کہ وزیراعظم محمد شہباز شریف جلد سیالکوٹ کا دورہ کریں گے اور منصوبے کا باضابطہ افتتاح کریں گے۔ یہ منصوبہ سیالکوٹ اور اس کے باسیوں کے لیے انتہائی اہمیت کا حامل منصوبہ ہے، اس فلائی اوور سے سیالکوٹ شہر کی ٹریفک روانی میں کافی بہتری آئے گی اور یہ کہ شہر میں ٹریفک کی روانی کے لیے سیالکوٹ لاری اڈہ کے قریب کے ایف سے سے لیکر کوٹلی بہرام تک انڈر پاس بھی تعمیر کریں گے۔ وفاقی وزیر دفاع کا کہنا تھا کہ ہمیں مہنگائی ورثے میں ملی ہے جو پی ٹی آئی کی سابق حکومت کی غلط پالیسیوں کا نتیجہ ہے، ہمیں مہنگائی کا مکمل احساس ہے اوریہ بات بھی حقیقت ہے کہ تیل، گیس اور کوئلہ کی قیمتیں تاریخ کی بلند ترین سطح پر ہیں لیکن اس کے باوجودہم پرعزم ہیں کہ ہم ان مشکل حالات پر قابو پانے میں کامیاب ہو جائیں گے اور ہمارے حالات ضرور بہتر ہونگے۔ وزیر دفاع خواجہ آصف نے کہا کہ 2023ء میں انتخابات ہونگے جس کے لیے ہم عوام کے پاس جائیں گے اور پھر عوام ہی فیصلہ کرے گی کہ کون حکمرانی کرے گا۔ دھاندلی زدہ سابق وزیراعظم عمران خان الزامات لگاتا ہے، باہر بڑھکیں مارتا ہے اور اندر جا کے ترلے منتیں کرنے لگ جاتا ہے، اقتدار کھو جانے پر عمران خان حواس باختہ ہو چکا ہے۔ انہوں نے کہا کہ عمران خان محسن کش ہے، جس نے بھی اس پر احسان کیا اس کو نہیں بخشا، عمران خان کے چہرے سے ایمانداری کا بہروپ تار تار ہو رہا ہے۔ عمران خان اپنے خون کا وفادار نہیں تو پھر یہ کسی شخص، کسی ادارے یا مٹی کا وفادار کیسے ہو سکتا ہے۔ خواجہ آصف نے کہا کہ ہم ملکی قانون اور آئین کے وفادار ہیں، ادارے اپنی آئینی حدود میں رہنا چاہتے ہیں لیکن عمران خان ان میں تفرقہ ڈالنا چاہتا ہے، الیکشن کمیشن آف پاکستان آئین کے مطابق جو فیصلہ کرتا ہے وہ بھی انکو قبول نہیں، اگلے سال 2023ء میں ملکی آئین کے مطابق صاف و شفاف انتخابات ہونگے۔ وزیر دفاع کا مزید کہنا تھا کہ عمران خان کا ایک ہی مشن ہے کہ ایٹمی طاقت پاکستان کمزور ہو، وہ اس ملک کے اداروں کو کمزور کرنا چاہتا ہے لیکن ہم پارلیمان سمیت اپنے تمام اداروں کا دفاع کریں گے اور کسی کو بھی رخنہ ڈالنے کی اجازت نہیں دیں گے۔ ایک سوال کے جواب میں وفاقی وزیر کا کہنا تھا کہ ضمنی انتخابات میں پاکستان مسلم لیگ (ن) تمام نشستیں جیتے گی۔ ایک اور سوال کے جواب میں انہوں نے کہا کہ میاں محمد نواز شریف جلد وطن واپس آئیں گے۔