ویب ڈیسک:جون 2025 میں ائیر انڈیا کے طیارے کے حادثے میں بچ جانے والے واحد مسافر نے کئی ماہ بعد پہلی بار اس حوالے سے بات کی ہے۔
وسواش کمار رمیش بھارتی شہر احمد آباد کے قریب حادثے میں کرشماتی طور پر بچ گئے تھے اور انہوں نے ایک انٹرویو میں کہا کہ وہ مسلسل اس واقعے کی جھلکیاں دیکھتے رہتے ہیں۔
39 سالہ وسواش کمار نے کہا کہ یہ کرشمے سے کم نہیں کہ وہ اب تک زندہ ہیں مگر اس حادثے میں بھائی کی موت نے ان کی ساری خوشی کو چھین لیا، اس حادثے میں ان کے بھائی کی موت کا مطلب یہ ہے کہ خاندان نے سب کچھ کھو دیا۔
انہوں نے کہا کہ 'میں نے اپنی خوشی سمیت سب کچھ کھو دیا، خدا نے مجھے زندگی دی ، وسواش کمار برطانوی شہریت رکھتے ہیں اور جون میں اپنے بھائی کے ساتھ خاندان سے ملنے کے لیے بھارت آئے ہوئے تھے۔
برطانوی میڈیا کو دیے گئے انٹرویو میں کہا کہ 'اس حادثے نے میرے خاندان کو مکمل طور پر توڑ دیا، یہ میرے اور میرے خاندان کے لیے بہت مشکل وقت ہے'۔
حادثے کے شکار طیارے میں 169 بھارتی شہری، 53 برطانوی، ایک کینیڈین اور 7 پرتگالی شہریوں سمیت 11 بچے موجود تھے۔
The sole survivor of the Air India plane crash, Ramesh Viswashkumar, shares his story of how he escaped from the emergency exit.
— Channel 4 News (@Channel4News) June 13, 2025
The crash in Ahmedabad, Gujarat killed 241 people. pic.twitter.com/8qF2ytRIBV
وسواش کمار نے کہا کہ اس حادثے کے بارے میں بات کرنا ان کے لیے بہت تکلیف دہ ہے اور انہوں نے اب تک اس کی پہلی یاد کے بارے میں کسی سے بات نہیں کی۔
ان کے دوستوں نے بتایا کہ وہ اب بھی اپنے خاندان کے قریبی افراد سے بات نہیں کرتے، وسواش کمار کا کہنا تھا کہ وہ ٹوٹ چکے ہیں اور رات بھر جاگتے رہتے ہیں کیونکہ حادثے کے مناظر آنکھوں کے سامنے گھومتے رہتے ہیں۔
خیال رہے کہ حادثے کی ابتدائی تحقیقاتی رپورٹ میں بتایا گیا تھا کہ حادثہ دونوں انجنوں کو ایندھن سپلائی بند ہونے کے باعث پیش آیا ۔
