ویب ڈیسک: وزارت مذہبی امور نے رواں سال کے حج پروگرام کے تحت واجبات کی وصولی کا باضابطہ آغاز آج سے کر دیا ہے، جس کے بعد خواہش مند افراد نامزد بینکوں اور آن لائن پورٹل کے ذریعے اپنی حج درخواستیں جمع کروا سکتے ہیں۔
وزارت کے ترجمان کے مطابق اس بار حج درخواستوں کی وصولی پہلے آئیے پہلے پائیے کی بنیاد پر کی جا رہی ہے، جس کے تحت پہلے سے رجسٹرڈ امیدواروں سے پہلی قسط آج سے 9 اگست تک وصول کی جائے گی، جبکہ نشستیں خالی ہونے کی صورت میں 11 سے 16 اگست تک نئے خواہش مند بھی درخواستیں جمع کرا سکیں گے۔
حکام کا کہنا ہے کہ جیسے ہی مخصوص نشستوں کی تعداد مکمل ہو گی، مزید حج واجبات کی وصولی کا عمل روک دیا جائے گا اور درخواست دہندگان میں سے حتمی خوش نصیبوں کا انتخاب رجسٹریشن کے وقتِ اندراج کی بنیاد پر کیا جائے گا۔
وزارت مذہبی امور کے مطابق سرکاری اسکیم کے تحت حج پیکج کا تخمینہ 11 لاکھ 50 ہزار سے 12 لاکھ 50 ہزار روپے کے درمیان رکھا گیا ہے، تاہم حتمی رقم کا انحصار فلائٹ کرایوں، سعودی عرب میں رہائش کے انتظامات اور ضیافت کے اخراجات پر ہوگا۔
مزید بتایا گیا ہے کہ اس بار حج پالیسی میں اہم تبدیلیاں کی گئی ہیں جن کے تحت دوبارہ حج کرنے کی پابندی ختم کر دی گئی ہے، یعنی ایسے افراد جو ماضی میں حج کر چکے ہیں وہ بھی دوبارہ سرکاری اسکیم کے ذریعے درخواست دینے کے اہل ہوں گے۔ اسی طرح عمر کی بالائی حد کا تقاضا بھی ختم کرتے ہوئے معمر افراد کو درخواست دینے کی اجازت دی گئی ہے۔
وزارت مذہبی امور نے اعلان کیا ہے کہ دوسری قسط کی وصولی یکم نومبر سے شروع ہوگی، جس کے بعد تمام منتخب عازمین کو ٹریننگ، صحت کا معائنہ اور ویزہ پراسس کے مراحل سے گزارا جائے گا۔
سرکاری ذرائع کے مطابق حکومت اس سال حج انتظامات کو مزید شفاف اور مؤثر بنانے کیلئے جدید آن لائن سسٹم استعمال کر رہی ہے جس کے ذریعے عازمین حج اپنی درخواستوں کی حیثیت، ادائیگیوں اور سفر کے شیڈول سے متعلق اپ ڈیٹ حاصل کر سکیں گے۔
وزارت نے عوام پر زور دیا ہے کہ وہ کسی بھی قسم کے بروکر یا غیر تصدیق شدہ ایجنٹ کے ذریعے درخواست دینے سے گریز کریں، جبکہ صرف نامزد بینکوں اور آفیشل پورٹل کے ذریعے ہی رجسٹریشن کروائیں۔