(ویب ڈیسک ) متحدہ عرب امارات میں اسلامی نئے سال پر 15 جون کو عام تعطیل کا اعلان کردیا گیا، ملازمین کو تین روزہ طویل ویک اینڈ ملے گا۔
متحدہ عرب امارات ( یو اے ای) نے اسلامی نئے سال کے موقع پر سرکاری اور نجی شعبے کے تمام ملازمین کے لیے 15 جون بروز پیر کو عام تعطیل کا اعلان کر دیا ہے، جس کے نتیجے میں ملک بھر کے ملازمین کو تین روزہ طویل ویک اینڈ میسر آئے گا۔
وفاقی اتھارٹی برائے سرکاری انسانی وسائل (FAHR) نے بدھ کے روز تعطیل کا اعلان کرتے ہوئے تصدیق کی کہ وفاقی حکومت کے ملازمین اسلامی ہجری سال 1448 ہجری کے آغاز کے موقع پر پیر کے دن چھٹی کریں گے۔
چونکہ یہ تعطیل ہفتہ اور اتوار کی معمول کی ہفتہ وار چھٹیوں کے فوراً بعد آ رہی ہے، اس لیے سرکاری اور نجی دونوں شعبوں کے ملازمین تین روزہ وقفے سے لطف اندوز ہوں گے اور منگل، 16 جون کو دوبارہ اپنے فرائض انجام دیں گے۔
خیال رہے کہ اسلامی سالِ نو محرم الحرام کے آغاز سے شروع ہوتا ہے، جو اسلامی کیلنڈر کا پہلا مہینہ ہے۔