ملک بھر میں ہیٹ ویو کی پہلی لہر،محکمہ موسمیات کا الرٹ جاری

ویب ڈیسک: محکمہ موسمیات (پاکستان میٹروولوجیکل ڈیپارٹمنٹ) نے خبردار کیا ہے کہ آنے والے ہفتوں میں ہیٹ ویوکے لیے سازگار حالات بن رہے ہیں، خاص طور پر جنوبی پنجاب اور سندھ کے میدانی علاقوں میں، کیونکہ مارچ–اپریل–مئی  کا موسم معمول سے زیادہ گرم رہنے کا امکان ہے۔

محکمہ موسمیات کے مطابق ملک کے بیشتر حصوں میں اوسط درجہ حرارت معمول سے زیادہ رہنے کی توقع ہے۔ سب سے زیادہ گرم ہونے کا امکان گلگت بلتستان، کشمیر اور شمالی خیبر پختونخوا میں ہے، جہاں معمول سےزیادہ گرمی پڑے گی۔

معمول سے زیادہ بارشوں کی پیشگوئی:

محکمہ موسمیات نے ملک بھر میں معمول سے زیادہ بارشوں کی بھی پیشگوئی کی ہے۔ سب سے زیادہ مثبت فرق وسطی سے مغربی حصوں، خاص طور پر جنوبی خیبر پختونخوا، وسطی پنجاب کے ملحقہ علاقے اور شمالی بلوچستان میں متوقع ہے، جس کی وجہ محکمہ موسمیات کے مطابق بہار کے دوران مغربی ہوا ؤں کے زیادہ سلسلے چلنے کو بتایاگیا ہے۔ 

دیگر کئی علاقوں، بشمول سندھ، وسطی سے جنوبی بلوچستان، شمالی خیبر پختونخوا، کشمیر اور گلگت بلتستان میں بارش معمول کے قریب رہنے کا امکان ہے۔

محکمہ موسمیات نے اگلے چند ہفتوں کے لیے ممکنہ عملی اثرات بھی بتائے ہیں:

بہار کے دوران درجہ حرارت کے فرق کی وجہ سے گرد و غبار کے طوفان، تیز ہوائیں اور اولے پڑ سکتے ہیں۔
اہم شہروں جیسے اسلام آباد/راولپنڈی اور لاہور میں پولن کا عروج جلد متوقع ہے، اور مارچ کے وسط کے بعد بارش پولن کے سیزن کو بڑھا سکتی ہے، جس سے الرجی کے شکار افراد متاثر ہو سکتے ہیں۔

گرم موسم کی وجہ سے میدانی ربیع کی فصلوں میں کیڑوں اور بیماریوں کی سرگرمی تیز ہو سکتی ہے، جس کے لیے بروقت نگرانی کی ضرورت ہوگی۔

علاوہ ازیں، محکمہ موسمیات نے خبردار کیا کہ گلگت بلتستان اور بالائی خیبر پختونخوا میں معمول سے زیادہ درجہ حرارت برف پگھلنے کی رفتار تیز کر سکتا ہے، جس سے موسم کے بعد گلیشیئر سے وابستہ خطرات جیسے GLOFs (glacial lake outburst floods) کا امکان بڑھ سکتا ہے۔

محکمہ موسمیات نے واضح کیا کہ یہ موسمی جائزہ عمومی رجحانات کی رہنمائی فراہم کرتا ہے اور روزمرہ منصوبہ بندی اور فیصلوں کے لیے مختصر مدت کی پیش گوئیوں کے ساتھ استعمال کرنا چاہیے۔