(ویب ڈیسک ) دلہا دلہن کو اپنے ویڈنگ شوٹ کے لیے پارک کا انتخاب کرنا مہنگا پڑگیا۔ پارک میں شادی کا فوٹو شوٹ کروانے والے دلہا دلہن ڈاکوؤں کے نشانے پر آگئے۔
دلہا دلہن شادی کے لمحات کو یادگار بنانے کے لیے حسین جگہوں پر (آؤٹ ڈور) فوٹو شوٹ کرواتے ہیں جس کے لیے پارکس بھی ایک بہترین آپشن سمجھا جاتا ہے۔ حال ہی پارک میں شادی کا فوٹو شوٹ کروانے والے دلہا دلہن ڈاکوؤں کے نشانے پر آگئے۔
رپورٹ کے مطابق اسلام آباد میں شادی کا جوڑا فوٹو شوٹ کرانے پارک پہنچا تو اچانک وہاں ڈاکو پہنچ گئے اور دونوں سے لوٹ مار کر کے فرار ہو گئے۔
واقعہ اسلام آباد کے سیکٹر آئی ایٹ کا ہے جہاں کچنار پارک پودوں اور درختوں سے بھرپور ایک دلکش پارک ہے جہاں دلہا دلہن فوٹو شوٹ کرانے وہاں کا رخ کرتے ہیں۔
رپورٹ کے مطابق پی ڈبلیو ڈی اسلام آباد کا رہائیشی محمد حامد مظہر اپنی نئی نویلی دلہن کے ہمراہ اس پارک میں فوٹو شوٹ کرانے پہنچا اور اس کے ساتھ دیگر فیملی ممبرز بھی تھے۔
مذکورہ جوڑا فوٹو شوٹ کے لیے پوز دینے میں مصروف تھا اور ساتھ آئے لوگ پارک کے دلفریب نظاروں سے لطف اندوز ہو رہے تھے کہ اچانک نامعلوم شخص آیا اور بزور اسلحہ دلہن سے پہنے گئے زیورات، دلہا اور دلہن سمیت اہلخانہ کے موبائل فونز، فوٹو گرافرز کے قیمتی کیمرے اور نقدی چھین کر پارک کے باہر کھڑے اپنے ساتھی کے ہمراہ موٹر سائیکل پر فرار ہوگیا۔
پولیس کے مطابق مذکورہ ڈکیتوں کو گرفتار کر کے ان سے چھینے گئے آرٹیفیشل زیورات، موبائل اور کیمرے برآمد کر لیے ہیں۔