ویب ڈیسک: وائٹ ہاؤس نے تصدیق کی ہے کہ ایران کے نیوکلیئر پروگرام سے متعلق مذاکرات جمعہ کو عمان کے دارالحکومت مسقط میں ہوں گے۔
واشنگٹن نے تہران کو واضح پیغام دیا ہے کہ مذاکرات کے مقام یا فارمیٹ میں کسی قسم کی تبدیلی قبول نہیں کی جائے گی، اور اگر ایران طے شدہ فارمیٹ میں واپس آتا ہے تو امریکا اس ہفتے یا آئندہ ہفتے ملاقات کے لیے تیار ہے۔
ایرانی ذرائع کے مطابق، امریکا نیوکلیئر پروگرام کے علاوہ دفاعی اور قومی سلامتی کے امور بھی زیر بحث لانا چاہتا ہے، لیکن تہران نے ان موضوعات کو غیر قابلِ مذاکرہ قرار دیا ہے۔ ایران کا موقف ہے کہ وہ صرف نیوکلیئر معاملات پر بات چیت کے لیے تیار ہے۔
یہ مذاکرات اس وقت ہو رہے ہیں جب خلیج فارس میں امریکی فوج کی بڑھتی ہوئی تعیناتی اور صدر ٹرمپ کی ممکنہ فوجی کارروائی کی دھمکیوں کے باعث امریکا اور ایران کے تعلقات شدید کشیدگی کا شکار ہیں۔
امریکا اور اسرائیل ایران پر ایٹمی ہتھیار بنانے کے الزامات عائد کرتے ہیں، جب کہ ایران ان الزامات کو مسترد کرتا ہے اور کہتا ہے کہ اس کا نیوکلیئر پروگرام صرف پرامن مقاصد کے لیے ہے، جس میں بجلی کی پیداوار شامل ہے۔