ویب ڈیسک: شمالی وزیرستان میں سیکیورٹی فورسز کی کارروائی میں 6 خوارجی ہلاک ہوگئے جبکہ فائرنگ کے شدید تبادلے میں لیفٹیننٹ کرنل سمیت 5 اہلکار شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسزنے شمالی وزیرستان کےعلاقے اسپن وام میں آپریشن کیا۔
آئی ایس پی آر کے مطابق سیکیورٹی فورسز نے شمالی وزیرستان کےعلاقےاسپن وام میں دہشت گردوں کی موجودگی کی اطلاعات پر آپریشن کیا، جس کے دوران 6 خوارجی مارے گئے۔
شہدامیں لیفٹیننٹ کرنل محمدعلی شوکت، نائیک محمداللہ، لانس نائیک اخترزمان، لانس نائیک شاہداللہ، لانس نائیک یوسف علی اورسپاہی جمیل احمد شامل ہیں۔
علاقے میں ممکنہ خوارجیوں کے خاتمے کیلئے کلیئرنس آپریشن جاری ہے۔
43 سالہ لیفٹیننٹ کرنل محمد علی شوکت شہیدکا تعلق فیصل آباد سے ہے۔ لیفٹیننٹ کرنل محمد علی شوکت شہید نے سوگواران میں اہلیہ اور تین بیٹے چھوڑے۔
30 سالہ لانس نائیک محمد اللہ شہید کا تعلق ضلع خیبر سے ہے۔ لانس نائیک محمد اللہ شہید نے پاک فوج میں 13 سال تک دفاع وطن کا فریضہ سرانجام دیا۔لانس نائیک محمد اللہ شہید نے اہلیہ غمگسار چھوڑی۔
30 سالہ لانس نائیک اختر زمان شہید کا تعلق ضلع لکی مروت سے ہے۔ لانس نائیک اختر زمان شہید نے 10 سال تک دفاع وطن کا فریضہ سر انجام دیا۔ لانس نائیک اختر زمان شہید نے اہلیہ سوگوار چھوڑی۔
29 سالہ لانس نائیک شاہد اللہ شہید کا تعلق ضلع ٹانک سے ہے۔لانس نائیک شاہد اللہ شہید نے 7 سال پاک فوج میں خدمات سرانجام دیں۔ لانس نائیک شاہد اللہ شہید نے سوگواران میں اہلیہ چھوڑی۔
31 سالہ لانس نائیک یوسف علی شہید کا تعلق لوئر اورکزئی سے ہے۔ لانس نائیک یوسف علی شہید نے 11 سال تک پاک فوج میں رہتے ہوئے دفاع وطن کا فریضہ سرانجام دیا۔لانس نائیک یوسف علی شہید نے غمگساروں میں اہلیہ چھوڑی۔
26 سالہ سپاہی جمیل احمد شہید کا تعلق ضلع سوات سے ہے۔سپاہی جمیل احمد شہید نے پانچ سال تک پاک فوج میں خدمات سرانجام دیں۔ سپاہی جمیل احمد شہید نے اہلیہ سوگوار چھوڑی۔
وزیراعظم محمد شہباز شریف
وزیراعظم محمد شہباز شریف نے ضلع شمالی وزیرستان کے علاقے سپن وام میں خوارجی دہشت گردوں کے خلاف کامیاب کارروائی کرتے ہوئے 6 خوارجی دہشت گردوں کو جہنم واصل کرنے پر سیکیورٹی فورسز کو خراج تحسین پیش کیا۔
وزیراعظم نے دہشت گردوں کا بہادری سے مقابلہ کرتے ہوئے جام شہادت نوش کرنے والے لیفٹیننٹ کرنل محمد شوکت، لانس نائیک محمد اللہ ، لانس نائیک اختر زمان ، لانس نائیک شاہد اللہ ، لانس نائیک یوسف اور سپاہی جمیل احمد کو خراج عقیدت دیتے ہوئے شہداء کی بلندی ء درجات کی دعاء اور ان کے اہل خانہ سے اظہار تعزیت کیا ہے۔
وزیراعظم شہبازشریف نے کہا ہے کہ دہشت گردی کے خلاف جنگ میں پاک فوج نے لازوال قربانیوں دیں ہیں،پوری قوم شہداء کو سلام پیش کرتی ہے،ہر قسم کی دہشت گردی کو جڑ سے اکھاڑ پھینکنے کے لئے پر عزم ہیں۔
اسپیکر قومی اسمبلی سردار ایاز صادق
اسپیکر قومی اسمبلی سردار ایاز صادق نےشمالی وزیرستان کے علاقہ سپن وام میں کلیئرنس آپریشن کے دوران سیکیورٹی فورسز پر خوارجی دہشتگردوں کے حملے کی مذمت کی ہے۔اسپیکر نے خوارجی دہشتگردوں کے حملے کے نتیجے میں لیفٹیننٹ کرنل محمد علی شوکت ،لانس نائیک محمد اللہ، محمد اختر زمان، شاہد اللہ، یوسف علی اور سپاہی جمیل احمد کو خراج عقیدت پیش کیا ہے۔
سردار ایاز صادق نے کہا کہ سیکیورٹی فورسز کے بہادر جوانوں کے جانی نقصان پر دل رنجیدہ ہے،شہداء کے اہلخانہ کے غم میں برابر کا شریک ہوں،شر پسند عناصر دشمن کے ناپاک ایجنڈے پر کار بند ہیں،ان سے آہنی ہاتھوں سے نمٹنا جائے گا،ملک و قوم کی خاطر جانیں قربان کرنے والے جری سپوتوں کی قربانیوں کو ہمیشہ یاد رکھا جائے گا۔
اسپیکر قومی اسمبلی نے کہا کہ ہمارے بہادر سپوتوں کا خون رائیگاں نہیں جائے گا،دہشتگردی کے خلاف جنگ میں پوری قوم متحد ہے،ملک میں بد امنی اور فساد برپا کرنے والے ملک اور قوم کے دشمن ہیں،پاکستان کا دشمن اپنے ناپاک عزائم میں کبھی بھی کامیاب نہیں ہو گا،اسپیکر کی اللہ تعالیٰ سے شہداء کے درجات کی بلندی اور لواحقین کیلئے صبر جمیل عطاء فرمانے کی دعا۔
وفاقی وزیر عبدالعلیم خان
سوات اور شمالی وزیرستان میں فتنہ خوارج کی سرکوبی پر وفاقی وزیر عبدالعلیم خان کی پاک فوج کو داد شجاعت، صدرآئی پی پی عبدالعلیم خان نےلیفٹنٹ کرنل محمد علی شوکت اور 5بہادر جوانوں کی شہادت پرخراج عقیدت پیش کیا ہے۔
عبدالعلیم خان نے کہا کہ چہار باغ اور سپن وام میں سیکیورٹی فورسزنے آپریشن میں 11خوارج کو واصل جہنم کیا،فتنہ خوارج کا خاتمہ ملکی دفاع، امن و سلامتی اور استحکام کے لئے نا گزیر ہے۔پوری قوم پاک فوج کے شانہ بشانہ کھڑی ہے، فتنہ پھیلانے والوں کو منہ کی کھانی پڑے گی،قومی اتحاد اور پاک فوج کے ساتھ اظہار یکجہتی دہشت گردی کے خلاف بہترین ہتھیار ہے،انشاءاللہ پاک فوج دفاع وطن کے عظیم مقاصد میں کامیاب ہو گی۔