ویب ڈیسک: ڈرگ ریگولیٹری اتھارٹی (ڈریپ) نے تین جعلی ادویات کے حوالے سے الرٹ جاری کرتے ہوئے ان کی فروخت اور استعمال پر فوری طور پر پابندی عائد کر دی ہے۔
ملک بھر میں جعلی ادویات کے خلاف جاری کارروائیوں کے دوران، ڈریپ نے تین جعلی ادویات کے بیچز کے بارے میں ریپڈ الرٹس جاری کیے ہیں۔ ان میں تسکین درد گولی (بیچ 091)، پین نل گولی (بیچ 01)، اور ڈوپھالیک سیرپ (بیچ 251986) شامل ہیں۔
ڈریپ کے مطابق، سینٹرل ڈرگ لیب کراچی اور ڈی ٹی ایل پنجاب نے ان ادویات کو جعلی قرار دیا ہے۔ ان میں سے تسکین درد گولی اور پین نل گولی غیر قانونی طور پر لیو ہیلتھ کیئر لیب اور حکیم پرانا دواخانہ کراچی نے تیار اور سپلائی کیں، اور ان کے پاس دواسازی کا کوئی لائسنس موجود نہیں تھا۔
اسی طرح، جعلی ڈوپھالیک سیرپ کے لیبل پر ملٹی نیشنل کمپنی ایبٹ فارما کینیڈا کا پتہ درج تھا، تاہم اس بیچ کے حوالے سے سازہائی نون فارما نے اس سے لاتعلقی ظاہر کی ہے۔
ڈریپ نے خبردار کیا ہے کہ جعلی ادویات کا استعمال جان لیوا ثابت ہو سکتا ہے اور علاج کے نتائج پر منفی اثرات ڈال سکتا ہے۔
ڈرگ ریگولیٹری اتھارٹی نے اپنی ریگولیٹری فورس کو ہدایت دی ہے کہ وہ جعلی ادویات کے سپلائرز کی نشاندہی کریں اور متاثرہ بیچز کو ضبط کریں۔ اس کے علاوہ، ڈسٹری بیوٹرز اور میڈیکل اسٹورز کو فوری طور پر آگاہ کرنے کی ہدایت کی گئی ہے تاکہ عوام کو محفوظ ادویات فراہم کی جا سکیں۔