یوم دفاعِ کے موقع پر سربراہ پاک بحریہ ایڈمرل محمد امجد خان نیازی کی جانب سے پیغام میں کہا گیا ہے کہ 6ستمبر قومی تاریخ کا یادگار دن ہے. تفصیلات کے مطابق یوم دفاعِ پاکستان کے موقع پر سربراہ پاک بحریہ نے پیغام جاری کیا ، سربراہ پاک بحریہ نے کہا کہ یہ دن دشمن کی جارحیت کے خلاف پاکستانی قوم کے بے مثال اتحاد اور پختہ عزم کی یاد دلاتا ہے اور پوری قوم نے افواج پاکستان کے شانہ بشانہ دشمن کی جارحیت کو شکست فاش دی۔ نیول چیف کا کہنا تھا کہ یہ دن شہداء اور غازیوں کی بے مثال بہادری اور قربانیوں کو سلام پیش کرنے کا دن ہے جبکہ پاک بحریہ عہد حاظر کے چیلنجز سے نمٹنے کے لئے بھی ہمہ وقت تیار ہے۔ نیول چیف کا کہنا تھا کہ پاک بحریہ حالیہ سیلاب سے متاثرہ ہم وطنوں کی ہرممکن مدد کے لیے کوشاں ہے۔ ان کا مزید کہنا تھا کہ آج پاک بحریہ کے تمام آفیسرز، جوان اور سویلینز ملکی بحری سرحدوں کے دفاع کے لئے اپنے عزم کو دہراتے ہیں تاکہ آنے والی نسلوں کیلئے ایک ترقی یافتہ اور پر امید مستقبل مہیا کیا جا سکے۔