ویب ڈیسک: ضلعی انتظامیہ اور تندور مالکان کے درمیان مذاکرات کی کامیابی کے بعد تندور مالکان نے آج کی جانے والی ہڑتال مؤخر کردی ہے۔
ذرائع کے مطابق شہر بھر کے 15 ہزار تندور مالکان نے ضلعی انتظامیہ کے ساتھ مذاکرات کامیاب ہونے کے بعد آج ہونے والی ہڑتال مؤخر کردی ہے۔ تندور مالکان نے مذاکراتی ٹیم کے سامنے آٹے میں سبسڈی کا مطالبہ رکھا اور کہا کہ 20 کلو آٹے کا تھیلا 1700 روپے میں دیا جائے۔
مذاکراتی ٹیم کا کہنا تھا کہ تندور مالکان کا مطالبہ حکومت پنجاب کے سامنے رکھیں گے۔ تندور مالکان نے دعویٰ کیا ہے کہ ضلعی انتظامیہ مان گئی ہے جس کے بعد روٹی 16 اور نان 25 روپے میں فروخت ہوگا، تاہم ضلعی انتظامیہ کا کہنا ہے کہ روٹی 16 روپے اور نان 20 روپے میں فروخت ہوگا۔
ڈپٹی کمشنر لاہور رافعہ حیدر نے متنبہ کیا ہے کہ روٹی اور نان زائد قیمت پر فروخت کرنے والوں کے خلاف سخت کارروائی ہوگی جبکہ نان بائی ایسوسی ایشن کے سینئر نائب صدر وحید عباسی نے کہا ہے کہ ضلعی انتظامیہ کو مطالبات کی منظوری کے لیے وقت دے دیا ہے۔