بارش سےپاک بھارت میچ ہو گا یا نہیں؟ اہم خبرآگئی

ٹی 20 ورلڈکپ؛ جنوبی افریقہ نے بنگلادیش سے جیت چھین لی

(ویب ڈیسک)ٹی ٹوئنٹی ورلڈکپ 2024 کے 21ویں میچ میں جنوبی افریقہ نے بنگلادیش کے خلاف شکست کو جیت میں بدل دیا۔ 

تفصیلات کے مطابق جنوبی افریقہ کے 114 رنز کے ہدف کے تعاقب میں بنگلادیش کی ٹیم 7 وکٹوں پر 109 رنز ہی بناسکی،نیو یارک کے نساؤ کاؤنٹی اسٹیڈیم میں کھیلے جانے اس میچ میں جنوبی افریقہ نے ٹاس جیت کر پہلے بیٹنگ کرنے کا فیصلہ کیا تھا،جنوبی افریقہ بیٹرز ابتدا میں تو سنبھل نہ سکے اور بنگلہ دیش کی عمدہ بولنگ کے سامنے بے بس نظر آئے جہاں اسکی 4 وکٹیں 23 رنز پر ہی گر گئیں۔ 

ڈیوڈ ملر اور ہینرک کلاسین نے 79 رنز کی پارٹنرشپ بنا کر ٹیم کے ٹوٹل کو اس مشکل وکٹ پر 100 سے زائد لے جانے میں مدد کی۔ کلاسین 46 اور ملر 29 رنز بنا کر آؤٹ ہوئے۔ بنگلادیش کی جانب سے تنظیم حسن نے 3، تسکین احمد نے 2 جبکہ رشد حسین نے ایک وکٹ لی۔ 

ہدف کے تعاقب میں بنگلادیش کا آغاز تو دم دار نہ تھا، لیکن مڈل آرڈرز میں محموداللّٰہ اور توحید ہریدوئے نے ذمہ دارانہ بیٹنگ کا مظاہرہ کرتے ہوئے میچ کو اپنے حق میں کرلیا۔ 

اننگز کے 17ویں اوور تک بنگلادیشی ٹیم چھائی رہی، اسے اختتامی تین اوورز میں جیت کےلیے 20 رنز چاہیے تھے لیکن جنوبی افریقہ نے شاندار کم بیک کرتے ہوئے میچ کا پانسہ پلٹ دیا۔ بنگلادیشی ٹیم اگلے تین اوورز میں صرف 15 جبکہ مقررہ 20 اوورز میں 109 رنز ہی بناسکی۔ 

پروٹیاز کی جانب سے کیشو مہاراج نے تین جبکہ کگیسو رباڈا اور اینرک نورکیا نے دو دو کھلاڑیوں کو آؤٹ کیا۔ میچ میں عمدہ بیٹنگ پرفارمنس پر ہینرک کلاسین کو میچ کا بہترین کھلاڑی قرار دیا گیا۔اس فتح کے ساتھ جنوبی افریقہ ورلڈکپ کے سپر 8 مرحلے میں پہنچنے والی پہلی ٹیم بن گئی۔   

T20 ورلڈکپ؛پاکستان کو بھارت کے ہاتھوں بدترین شکست

(ویب ڈیسک)آئی سی سی مینز ٹی ٹوئنٹی ورلڈکپ میں بھارت نے پاکستان کو بدترین شکست سے دوچار کردیا، 119 رنز کے تعاقب میں پاکستانی ٹیم  کی بیٹنگ لائن لڑکھڑاگئی اور  پوری ٹیم 113 رنز پر ڈھیر ہوگئی۔

تفصیلات کے مطابق نیویارک کے نساؤ کاؤنٹی انٹرنیشنل کرکٹ اسٹیڈیم میں گروپ اے کی ٹیموں کے درمیان کھیلے گئے میچ میں بھارت نے پاکستان کو جیت کیلئے 120 رنز کا ہدف دیا تھا۔پاکستان ٹیم بھارت کی جانب سے آسان ہدف کے تعاقب میں بھی ناکام رہی اور 20 اوورز میں 7 وکٹوں کے نقصان پر 113 رنز بناسکی۔

ہدف کے تعاقب میں پاکستان کی اننگز کا آغاز بابر اعظم اور محمدف رضوان نے کیا، پاکستان کی پہلی وکٹ 26 رنز پر گر گئی، بابراعظم 13 رنز بنانے کے بعد جسپریت بمراہ کی گیند پر سلپ پر کھڑے فیلڈر کو کیچ تھما گئے۔

57 کے مجموعی اسکور پر پاکستان کو دوسرا نقصان عثمان خان کی صورت میں اٹھانا پڑا جو 13 رنز بناکر اکشر پٹیل کی گیند پر ایل بی ڈبلیو ہوئے۔

پاکستان کی تیسری وکٹ 73 رنز پر گری جب فخر زمان بھی 13 رنز بنانے کے بعد پویلین لوٹ گئے۔ انکے بعد بیٹنگ کیلئے آنیوالے شاداب خان صرف 4 رنز ہی بناسکے اور پانڈیا کی گیند پر کیچ آؤٹ ہوگئے۔

بھارت کے صرف تین کھلاڑی ہی ڈبل فگرز میں داخل ہوئے جن میں رشب پنت نے 42، اکشر پٹیل نے 20 اور کپتان روہت شرما نے 13 رنز بنائے۔حارث رؤف اور نسیم شاہ نے 3، 3، محمد عامر نے 2 اور شاہین آفریدی نے ایک کھلاڑی کو پویلین کی راہ دکھائی۔

پاک بھارت ٹاکرا، اسٹیڈیم اور اطراف میں بارش شروع، پچ کو کورکردیا گیا

(ویب ڈیسک )  ٹی ٹوئنٹی ورلڈ کپ کا 19واں میچ پاکستان اور بھارتی کے درمیان کھیلا جائے گا تاہم میچ سے قبل  تیز بارش شروع ہوگئی ہے۔

ٹی ٹوئنٹی ورلڈ کپ  میں  پاک بھارت میچ سے قبل ہی نیور یارک میں تیز بارش شروع ہوگئی۔نیسا اسٹیڈیم کے پچ کو کور سے ڈھک دیا گیا ہے۔

اس سے قبل خبریں آرہی تھیں کہ  نیویارک نساو کاؤنٹی میں مطلع ابر آلود ہے اور آج صبح سے علاقے میں بادل چھائے ہوئے ہیں، ساتھ میں ہوا چل رہی ہے۔جبکہ  مقامی وقت کے مطابق گیارہ سے بارہ بجے کے درمیان بارش کی پیش گوئی کی  تھی۔

پاک بھارت ٹاکرا،اربوں روپے کاجوالگ گیا

ویب ڈیسک: (جوادملک)کرکٹ کی دنیا کا سب سے بڑا ٹاکرا، سٹے باز بھی میدان میں آگئے،پاک بھارت ٹاکرے پر اربوں روپے کا جوا لگ گیا جبکہ سٹے بازوں نے بھارتی ٹیم کو فیورٹ قرار دیدیا۔

تفصیلات کے مطابق   ورلڈ کپ کے 7 مقابلوں میں انڈیا اور پاکستان مدمقابل ہوئے اور پاکستان کو 6 بار ہرایا،سٹے بازوں نے پیشگوئی کی ہے کہ آج کےمیچ میں پاکستان کی جیت کے امکانات 29 فیصد جبکہ انڈیا کے 71 فیصد ہیں،سٹے بازوں نے انڈین ٹیم کا ریٹ 1.42 جبکہ پاکستانی ٹیم کا ریٹ 3.07 مقرر کیا ہے۔

سٹے باز کہتے ہیں کہتے ہیں کہ امریکہ سے ہارنے کے باعث پاکستانی ٹیم شدید دباؤمیں ہے،انڈیا ٹیم اپنا پہلا میچ جیت گئی جس سے اسکے کھلاڑیوں کا اعتماد بڑھا ہے،انڈیا ٹاس جیت گیا تو پاکستان کو کھیلنے کی دعوت دے گا۔

سٹے بازوں نے دعویٰ کیا ہے کہ نیویارک کی پیچ پر 180 کا سکور مخالف ٹیم کیلئے مشکلات پیدا کرے گا۔ گراؤنڈ میں انڈین ٹیم کی سپورٹرز پاکستانی ٹیم سے زیادہ ہونگے۔

پاکستان کے خلاف میچ سے قبل بھارتی ٹیم کیلئے بُری خبر

ویب ڈیسک: آئی سی سی ٹی ٹوئنٹی ورلڈکپ میں سب سے بڑے میچ کے لیے بھارتی فاسٹ بولر جسپریت بمراہ کو فٹنس ٹیسٹ پاس کرنا ہوگا۔

تفصیلات کے مطابق ذرائع کا کہناہے کہ جسپریت بمراہ نیٹ میں پریکٹس کے دوران پاؤں کی تکلیف کاشکار ہوئے تھے۔

واضح رہے کہ پاکستان اور بھارت کے خلاف میچ آج نیویارک کے نساؤ کرکٹ اسٹیڈیم میں پاکستانی وقت کے مطابق شام 7 بج کر 30 منٹ پر شروع ہوگا۔

نیویارک کے اسٹیڈيم میں اب تک ورلڈکپ کے ہوئے میچز میں وکٹ توقعات کے مطابق دکھائی نہيں دی ، آئی سی سی بھی وکٹ کے معیار پر مطمئن نہیں ، وکٹ کی درستی کے لیے کام شروع کردیا گیا۔

پاک بھارت میچ ملک بھر میں بڑی اسکرینوں پردکھایاجائےگا

ویب ڈیسک:شائقین کرکٹ کیلئے خوشخبری،ملک بھر کے متعدد مقامات پر بڑی اسکرین پر پاک بھارت میچ دکھایا جائے گا۔ٹی ٹوئنٹی ورلڈکپ میں روایتی حریف پاکستان اور بھارت کے درمیان ہائی وولٹیج میچ کو دیکھنے کیلئے کرکٹ کے مداحوں میں جوش و خروش عروج پر پہنچ گیا۔

 امریکہ کے شہر نیویارک کے34 ہزار نشستوں کے عارضی نساؤ کاونٹی کرکٹ اسٹیڈیم میں متوقعہ سننی خیز مقابلے پر دنیا بھر کی طرح شہریوں کی بھی نظریں جمی ہوئی ہیں، شہر کے مختلف مقامات پر دنیا کے سب سے بڑے مقابلے کو براہ راست دکھانے کے لیے بڑی اسکرینز نصب کی جا رہی ہیں۔

سر سید یونیورسٹی اسپورٹس گراونڈ میں لائیو اسٹریمنگ کا اہتمام کیا گیا ہے جہاں طلبا و طالبات کے ساتھ فیکلٹی ممبران اور دیگر بڑی اسکریں پر میچ دکھ سکیں گے۔ 
 کیماڑی کے ساحل پر پورٹ گرانڈ میں بھی بڑی اسکرین لگائی جارہی ہے، آرٹس کونسل اف پاکستان کراچی،کراچی پریس کلب اور نجی کلبز کے ساتھ ساتھ گلی اور محلے کی بنیاد پر بھی میچ کو براہ راست دکھانے کا اہتمام کیا گیا ہے۔

وزیر کھیل سندھ سردار محمد بخش مہر کی ہدایت پر محکمہ کھیل بھر میں عوامی مقامات پر بڑی اسکرین پر پاک بھارت میچ لائیو دکھائے گا۔ کراچی، حیدرآباد، لاڑکانہ، سکھر سمیت دیگر اضلاع میں پاک بھارت میچ لائیو دکھانے کا اہتمام کیا گیا ہے۔

حیدرآباد میں نیشنل اسٹیڈیم، خیرپور میں ممتاز کرکٹ گراؤنڈ اور ٹنڈو محمد خان میں پاک بھارت میچ اسکرین پر لائیو دکھایا جائے گا۔

دوسری جانب راولپنڈی کرکٹ اسٹیڈیم میں بھی بڑی اسکرین نصب کردی گئی ہے جبکہ اسٹیڈیم میں داخلے کی فیس بھی رکھی گئی ہے شائقین بک می ڈاٹ پی کے سے ٹکٹ حاصل کرکے لائیو اسٹریم میچ سے اسٹیڈیم میں لطف اندوز ہوسکیں گے۔

واضح رہے کہ پاکستانی وقت کے مطابق شام 7:30 بجے شروع ہونے والے میچ کو دنیا بھر میں ریکارڈ 40 کروڑ افراد دیکھیں گے۔

دریں اثنا شائقین کرکٹ نے حکام سے مطالبہ کیا ہے کہ پاک بھارت میچ کے موقع پر بجلی کی لوڈشیڈنگ سے اجتناب برتا جائے تاکہ شہری سکون اور آرام کے ساتھ میچ سے لطف اندوز ہوسکیں۔

کیا ڈونلڈ ٹرمپ بھی پاک بھارت میچ دیکھنے آئیں گے؟

ویب ڈیسک:  امریکا میں جاری ٹی 20 ورلڈ کپ کے دوران آج پاک بھارت میچ میں سابق صدر ڈونلڈ ٹرمپ نے دلچسپی ظاہر کی ہے، اور ان کی اسٹیڈیم آمد متوقع ہے۔

امریکی میڈیا رپورٹس کے مطابق آج ہونے والے پاک بھارت ٹاکرے میں سابق صدر ٹرمپ کی آمد کے پیش نظر نیویارک کے نساؤ کاؤنٹی کرکٹ اسٹیڈیم میں صدارتی سیکیورٹی کے احکامات جاری کر دیے گئے ہیں۔

منتظمین نے ڈونلڈ ٹرمپ کو پاک بھارت کرکٹ میچ دیکھنے کی دعوت دی تھی، جو ٹرمپ نے قبول کر لی، ٹرمپ کھیلوں کے پرستار ہیں اور ریسلنگ مقابلوں میں اکثر شرکت کرتے ہیں۔

بتایا جا رہا ہے کہ ڈونلڈ ٹرمپ کی متوقع آمد پر صدارتی سیکیورٹی بھی اسٹیڈیم میں موجود ہوگی۔

کاؤنٹی کے پولیس کمشنر پیٹرک رائیڈر نے میڈیا کو بتایا کہ پاک بھارت میچ کے دوران نیویارک پولیس ڈیپارٹمنٹ، فیڈرل بیورو آف انویسٹی گیشن اور کئی دیگر ایجنسیاں کسی بھی سیکیورٹی خطرے سے نمٹنے کے لیے تیار ہوں گی۔

ٹی ٹوئنٹی ورلڈکپ:پاک بھارت میچ سےقبل قومی ٹیم کیلئےبُری خبرآگئی

ویب ڈیسک: پاکستان اور بھارت کے درمیان آئی سی سی ٹی 20 ورلڈ کپ کے ہائی وولٹیج ٹاکرے سے قبل قومی ٹیم کے لیے بری خبر آگئی،آل راؤنڈر شاداب خان بھی انجری کا شکار ہوگئے، جس کے باعث ان کی بھارت کے خلاف میچ میں شرکت مشکوک ہوگئی۔

تفصیلات کے مطابق پاکستان اور بھارت میچ سے قبل بری خبر ہے کہ شاداب خان بھی ان فٹ ہوگئے۔

ذرائع کے مطابق شاداب خان پریکٹس سیشن کے دوران کمر درد میں مبتلا ہوگئے، جس کے باعث ان کی بھارت کے خلاف ہائی وولٹیج میچ میں شرکت مشکوک ہوگئی۔

ذرائع کا کہنا ہے کہ شاداب خان کی جگہ صائم ایوب کو شامل کرنے پر غور جاری ہے جبکہ امریکا کے خلاف صفر پر آؤٹ ہونے والے مڈل آرڈر بیٹر اعظم خان بھارت کے خلاف میچ سے آؤٹ ہوگئے جبکہ عماد وسیم کو اعظم خان کی جگہ ٹیم میں جگہ ملے گی۔

ذرائع کے مطابق بھارت کے خلاف پاکستان کے 11 کھلاڑیوں میں کپتان بابر اعظم، محمد رضوان، عثمان خان، فخر زمان، افتخار احمد، شاداب خان، عماد وسیم، شاہین آفریدی، حارث رؤف، محمد عامر اور نسیم شاہ شامل ہیں۔

بابر اعظم کو آؤٹ کرنے کیلئے بھارتیوں کا نعرہ تیار

ویب ڈیسک: پاک بھارت میچ سے قبل بھارتی شائقین نے بابر اعظم کو آؤٹ کرنے کیلئے نعرہ تیارکرلیا۔

تفصیلات کے مطابق پاک بھارت میچ میں ہمیشہ ہی مداحوں کی جانب سے کچھ منفرد دیکھنے کو ملتا ہے اور اس مرتبہ بھی ایسا ہی ہوا ہے۔بھارتی مداحوں نے پاکستان کے خلاف میچ سے قبل کپتان بابر اعظم کے لیے ایک نعرہ تیار کیا ہے جس پر بھارتی وکٹ کیپر بیٹر نے بھی اپنا ردعمل دیا ہے۔

بھارتی میڈیا کے مطابق مداحوں نے نعرہ تیار کیا ہے کہ ’تیل لگاؤ ڈابر کا، وکٹ لو بابر کا‘۔

بھارتی میڈیا کے مطابق اس جملے پر بھارتی وکٹ کیپر بیٹر رشبھ پنت نے بھی اپنے خیالات کا اظہار کیا ہے۔

بھارتی ٹی وی پر بات کرتے ہوئے رشبھ پنت نے کہا کہ پاک بھارت میچز میں دونوں ممالک کے جذبات بہت زیادہ دیکھنے میں آتے ہیں۔

انہوں نے اس جملے پر مسکراتے ہوئے کہا کہ یہ مقابلے کو مزید دلچسپ بناتا ہے۔

پاک بھارت میچ: 10 سیکنڈ کے اشتہار کا ریٹ 48 ہزار ڈالر

ویب ڈیسک: ٹی 20ورلڈکپ میں پاکستان کرکٹ ٹیم کی پہلے میچ میں امریکا کے ہاتھوں شکست کے بعد بھارت کے خلاف اتوار کے میچ کی کشش برقرار ہے۔ 

مقابلے کے دوران بڑے برانڈز کی جانب سے اشتہارات کی بکنگ کا سلسلہ جاری ہے۔

بھارتی میڈیا کے مطابق اشتہار کا فی 10سیکنڈ ریٹ 48ہزار ڈالر تک پہنچنے کا امکان ہے۔ جو کہ پاکستانی کرنسی کے حساب سے 1 کروڑ 38 لاکھ روپے سے زائد بنتا ہے۔

پاک بھارت میچ کے ٹکٹ کی قیمت کروڑوں میں پہنچ گئی

ویب ڈیسک: پاکستان اور بھارت کے میچز جہاں سب کی توجہ حاصل کر لیتے ہیں وہیں کرکٹ اسٹیڈیم میں ٹکٹس کی قیمت بھی سب کو حیران کر دیتی ہیں۔

ٹی 20 ورلڈ کپ 2024 میں امریکا کے ناساؤ کاؤنٹی کرکٹ اسٹیڈیم میں ٹکٹس کی قیمت بھی آسمان کو چھو رہی ہے۔

اسٹیڈیم میں 20 نشستوں (رووز) کی 30 سیٹیں ایسی بھی ہیں جن کی قیمت کروڑں میں ہے۔ ایسٹ میڈو میں موجود 252 سیکشن میں 20 نشستوں پر یہ 30 سیٹیں اپنی قیمت کی باعث وائرل ہیں۔

غیر ملکی میڈیا رپورٹ کے مطابق ری سیل میں ان سیٹوں کی قیمت1 لاکھ 75 ہزار 400 ڈالرز بن رہی ہے جو کہ پاکستانی تقریبا پونے 5 کروڑ روپے کی رقم بنتی ہے۔

تاہم ضروری نہیں ہے کہ جو قیمت اسٹب ہب نامی ویب سائٹ پر ڈیمانڈ کی جا رہی ہے، وہی اس پر خریدا جائے، یہ محض فروخت کرنے والے کی جانب سے ڈیمانڈ کی گئی ہے۔

دوسری جانب 252 سیکشن کی اسی نشست سے آگے 21 نشست سیٹوں کی قیمت 693 ڈالرز تک ہے جو کہ پاکستانی تقریبا 2 لاکھ روپے بنتے ہیں۔

جبکہ 19 ویں نشست کے ٹکٹ کی قیمت 801 ڈالرز ہیں جو کہ پاکستانی 2 لاکھ 24 ہزار روپے بنتے ہیں۔

جبکہ غیر ملکی میڈیا رپورٹ کے مطابق جمعے کی رات تک کچھ ٹکٹس باقی تھے، جن میں باؤنڈری کلب سیکشن اور ڈائمنڈ کلب سیکشن کے ٹکٹس شامل تھیں۔

 باؤنڈری کلب سیکشن کے ٹکٹس کی فروخت 1500 ڈالرز میں ہو رہی تھی جو کہ پاکستانی تقریبا 4 لاکھ 19 ہزار روپے بنتے ہیں جبکہ ڈائمنڈ کلب سیکشن کے ٹکٹس کی فروخت 10 ہزار ڈالرز میں ہو رہی تھی جو کہ پاکستانی تقریبا 30 لاکھ بنتے ہیں۔ 

واضح رہے ڈائمنڈ کلب سیکشن میں فری وی آئی پی پارکنگ کی سہولت سمیت لامحدود کھانا اور کولڈ ڈرنکس کا استعمال کیا جا سکتا ہے۔

پاک بھارت ہائی وولٹیج میچ، ٹاس کیا کردار ادا کرسکتا ہے؟

ویب ڈیسک: معروف بھارتی کمنٹیٹر آکاش چوپڑا نے بھی ٹی20 ورلڈکپ میں پاک بھارت میچ کے دوران ٹاس کو اہم قرار دیدیا۔

نیویارک کے نساؤ کاؤنٹی کرکٹ اسٹیڈیم میں آج روایتی حریف پاکستان اور بھارت کی ٹیمیں آج مدمقابل آئیں گی، میگا ایونٹ کا اہم معرکہ پاکستانی وقت کے مطابق شام 7:30 بجے شروع ہوگا۔

آکاش چوپڑا کا کہنا ہے کہ امریکی ٹیم سے شکست کے بعد پاکستان زخمی شیروں کی طرح حملہ کرسکتا ہے، اہم ٹاکرے میں دونوں ٹیموں پر دباؤ ہوگا تاہم مجھے لگتا ہے کہ بھارت فیورٹ ہے۔

بھارتی کمنٹیٹر کا کہنا ہے کہ ہندوستانی گیند بازوں پر بہت زیادہ توجہ دی جائے گی کیونکہ حالات انکے کیلئے سازگار ہیں تاہم آل راؤنڈر ہاردک پانڈیا کا بیٹنگ اور باؤلنگ میچ کا رخ بدل سکتی ہے۔

دوسری جانب قومی ٹیم میں عماد وسیم کی واپسی ہوئی ہے وہ بھارت کیخلاف میچ کیلئے فٹ قرار دیئے گئے ہیں، نیویارک میں آج بارش کی بھی پیشگوئی بھی کی گئی ہے لیکن ایسے بھی حالات نہیں لگتے کہ میچ ہی نہ ہوسکے۔

امید ہےبھارت کیخلاف میچ میں کم بیک کریں گے:گیری کرسٹن

ویب ڈیسک:پاکستان کرکٹ ٹیم کے ہیڈکوچ گیری کرسٹن نےکہا ہےکہ امید ہےکہ بھارت کے خلاف میچ میں کم بیک کریں گے۔ پاکستان اور بھارت دونوں کے پاس اچھے بولرز ہیں، نیویارک کی وکٹ پر بیٹرز کو کافی بہادری سے کھیلنا ہوگا۔

تفصیلات کے مطابق نیویارک میں پریس کانفرنس کرتے ہوئے گیری کرسٹن کا کہنا تھا کہ ہم کل بہترین کھیل پیش کریں گے، میں ماضی پر انحصار نہیں کرتا،بھارت اور پاکستان کے درمیان میچ ایک بڑا میچ ہے اور پلیئرز کو اس کا اندازہ ہے، پچھلی شکست کو بھلا کر اس میچ میں فوکس کرنا ہوگا، ٹی ٹوئنٹی میں صورتحال تیزی سے تبدیل ہوتی ہے، ہمیں فیصلہ سازی میں پھرتی لانا ہوگی۔

 گیری کرسٹن کا کہنا تھا کہ عماد وسیم بھارت کے خلاف میچ میں دستیاب ہوں گے، ایک دو پلیئرز کی فٹنس دیکھ رہے اس لیے ابھی فائنل الیون کا فیصلہ نہیں ہوا، کھلاڑیوں کو ایک دوسرے کا اندازہ ہے، ہمیں کنڈیشنز کے مطابق اپنا بہتر کھیل پیش کرنا ہے، اس گیم کے لیےکسی کو جوش دلانے کی ضرورت نہیں، جو دو روز قبل ہوا اس کو بھلا چکے، وہ ہوگیا، اب نیا میچ ہے، ہمیں بطور ٹیم اچھا کھیلنے کی ضرورت ہے۔

 ہیڈکوچ قومی ٹیم کا کہنا تھا کہ کسی ٹیم کے یہاں دو چار میچز  زیادہ کھیلنے سےکسی کو ایڈوانٹیج نہیں ملتا، ہماری اسٹیرنتھ فاسٹ بولنگ ہی ہے، پاکستان اور بھارت دونوں کے پاس اچھے بولرز ہیں، نیویارک کی وکٹ پر بیٹرز کو کافی بہادری سے کھیلنا ہوگا۔

یہ نہیں سوچ سکتے پچھلا میچ پاکستان ہارا تو یہ بھی ہار سکتا ہے:روہت شرما

ویب ڈیسک: بھارتی کرکٹ ٹیم کے کپتان روہت شرما نے کہا ہے کہ پاکستان ٹیم پچھلی بار زمبابوے سے ہارنے کے بعد فائنل کھیلی تھی، یہ نہیں سوچ سکتے کہ پچھلا میچ پاکستان ہارا تو یہ بھی ہار سکتا ہے۔

تفصیلات کے مطابق نیویارک میں پریس کانفرنس کرتے ہوئے روہت شرما کا کہنا تھاکہ پچ جیسی ہو، سامنا کسی سے بھی ہو، ہمیں اپنی بہترین کرکٹ کھیلنی ہے۔

انہوں نے کہا کہ پاکستان کےخلاف میچ کےلیےگیم پلان پربات ہوئی ہے، ٹیم میں سب تجربہ کار پلیئرہیں، ان سےاچھے کی توقع ہے، کسی ایک دو کھاڑیوں  پرانحصارنہیں کرسکتے، تمام 11 کوکردار ادا کرنا ہوگا اہم پلیئر ہر اسکواڈ میں ہوتےہیں لیکن کردارسب کا ہی رہتا ہے۔

ان کا کہنا تھاکہ یہاں کی کنڈیشنز میں مشکلات ہیں لیکن جیت کیلئے اس کو عبور کرنا ہوگا، یہاں ہر اوور میں گیم تبدیل ہوتا ہے، اس لیے زیادہ آگے کا نہیں سوچتے۔

پاکستان ٹیم سے متعلق روہت شرما نے کہا کہ پاکستان پچھلی بار زمبابوے سے ہارنے کے بعدبھی فائنل کھیلاتھا، ٹی ٹوئنٹی میں کسی بھی وقت صورتحال بدل جاتی ہے، یہ نہیں سوچ سکتےکہ پچھلا میچ پاکستان ہارا تویہ بھی ہار سکتا ہے، پاکستان ٹیم یقینی طور پر اپنی غلطی کا تجزیہ کرکے آئے گی۔

ان کا کہنا تھاکہ کبھی اچھے آغاز کے بعد بھی ٹیمیں لڑکھڑا جاتی ہیں، نیویارک میں دونوں ٹیم کیلئے یکساں کنڈیشنز اور موقع ہوگا، ہم یہاں صرف چھ سات دن پہلے آئے ہیں، نیویارک ہمارا ہوم گراؤنڈ نہیں، جو اچھا کھیلے گا وہ جیتے گا، اس سے فرق نہیں پڑنا کہ کون پہلےنیویارک پہنچا۔

بھارتی کپتان نے مزید کہا کہ نیویارک کی پچ پرباؤنڈری اور چھکے نہیں ملتے، بھاگ کر رن لینا اہم ہوگا، ٹی ٹوئنٹی میں ہرٹیم کسی بھی ٹیم کو ہرانے کی صلاحیت رکھ سکتی ہے۔

خیال رہے کہ ٹی ٹوئنٹی ورلڈ کپ میں پاکستان اور بھارت کل نیویارک کے کرکٹ اسٹیڈیم میں مدمقابل ہونگے۔

پاک بھارت ٹاکرا، پلیئنگ الیون فائنل،اعظم خان آؤٹ

ویب ڈیسک: ٹی ٹوئنٹی ورلڈکپ میں امریکا کے خلاف صفر پر آؤٹ ہونے والے پاکستانی بیٹر اعظم خان بھارت کے خلاف میچ سے آؤٹ ہوگئے۔

پاکستان اور بھارت کے درمیان ٹی ٹوئنٹی ورلڈکپ کا میچ آج نیویارک میں کھیلا جائے گا۔

پاکستان کو ٹی ٹوئنٹی ورلڈکپ میں اپنے پہلے میچ میں امریکا کے ہاتھوں سپر اوور میں اپ سیٹ شکست ہوئی تھی جبکہ بھارت نے اپنے پہلے میچ میں آئر لینڈ کو 8 وکٹوں سے ہرایا تھا۔

ذرائع کے مطابق پاک بھارت ٹاکرے کیلئے پاکستانی ٹیم کے 11 کھلاڑی فائنل کرلیے گئے ہیں۔

ذرائع کا کہنا ہے کہ امریکا کے خلاف صفر پر آؤٹ ہونے والے پاکستانی بیٹر اعظم خان بھارت کے خلاف میچ سے آؤٹ ہوگئے،عماد وسیم کو اعظم خان کی جگہ ٹیم میں جگہ ملے گی۔پاکستان ٹیم بھارت کے خلاف چار فاسٹ بولرز ، دو آل راؤنڈرز، اسپنرز کیساتھ میدان میں اترے گی۔

ذرائع کے مطابق کپتان بابر اعظم اور کوچ گیری کرسٹن کا اعظم خان پر سے اعتماد اُٹھ گیا ہے۔

ذرائع کا کہنا ہے کہ بھارت کے خلاف میچ سے قبل اعظم خان کو ٹیم کی نیٹ پریکٹس میں ایک گیند بھی کھیلنے کو نہ مل سکی، وہ پریکٹس کے دوران تنہا کھٹرے رہے۔

ذرائع کے مطابق بھارت کے خلاف پاکستان کی اننگز کا آغاز کپتان بابر اعظم اور وکٹ کیپر محمد رضوان کریں گے۔

ذرائع کے مطابق بھارت کے خلاف پاکستان کے 11 کھلاڑیوں میں کپتان بابر اعظم ،محمد رضوان ، عثمان خان، فخر زمان ، افتخار احمد ، شاداب خان ، عماد وسیم ، شاہین آفریدی ،حارث رؤف ، محمد عامر اور نسیم شاہ شامل ہیں۔

پاک بھارت ٹاکرا،وکٹ کے حوالےسےاہم خبر

ویب ڈیسک: آئی سی سی مینز ٹی ٹوئنٹی ورلڈکپ میں پاک بھارت میچ میں وکٹ کا برتاؤ کیسا ہوگا، ماہرین نے نظریں جمالیں۔

تفصیلات کے مطابق ٹی ٹوئنٹی ورلڈ کپ میں پاکستان اور بھارت آج نیویارک کے نساؤ کاؤنٹی کرکٹ اسٹیڈیم میں مدمقابل آرہے ہیں۔

نیویارک کے اسٹیڈیم میں اب تک ورلڈکپ کے ہوئے میچز میں وکٹ توقعات کے مطابق دکھائی نہیں دی ، آئی سی سی بھی وکٹ کے معیار پر مطمئن نہیں ، وکٹ کی درستی کے لیے کام شروع کردیا گیا۔

انٹرنیشنل کرکٹ کونسل کا کہنا ہےکہ نساؤ اسٹیڈیم کی وکٹ میں وہ تسلسل نہیں دکھا جس کی سب کو توقع تھی، تاہم بقیہ میچوں کے لیے وکٹ کی کوالٹی بہتر کرنے کے لیے بہترین ٹیمیں کام کر رہی ہیں۔

پاکستان اور بھارت کے درمیان میچ پاکستانی وقت کے مطابق شام ساڑھے 7 بجے شروع ہوگا۔

واضح رہے کہ پاکستان کو ٹی ٹوئنٹی ورلڈکپ میں اپنے پہلے میچ میں امریکا کے ہاتھوں سپر اوور میں اپ سیٹ شکست ہوئی تھی جبکہ بھارت نے اپنے پہلے میچ میں آئر لینڈ کو 8 وکٹوں سے ہرایا تھا۔

ٹی ٹوئنٹی ورلڈکپ:بھارت کی پاکستان کیخلاف بیٹنگ جاری، ویرات، روہت آؤٹ

ویب ڈیسک: آئی سی سی ورلڈ کپ 2024ء کے سب سے بڑے ٹاکرے میں  روایتی حریف پاکستان اور بھارت آج آمنے سامنے ہیں ۔بھارت کی پاکستان کیخلاف  بیٹنگ جاری ہے۔اس وقت بھارتی کپتان روہت شرما اور ویرات کوہلی آؤٹ ہوچکے ہیں ۔

نیویارک میں کھیلے جانے والے میچ میں قومی ٹیم کے کپتان بابر اعظم نے ٹاس جیت کر پہلے فیلڈنگ کا فیصلہ کیا۔

بارش کے بعد میچ شروع ہوا تو  ویرات کوہلی 4 رنز بناکر نسیم شاہ کی بال پر کیچ آؤٹ ہوگئے۔پاکستان کےخلاف بھارت کی پہلی وکٹ 12 رنز پرگری۔بھارت کی دوسری وکٹ 19 رنز پر گری جب بھارتی کپتان روہت شرما شاہین آفریدی کی گیند پر کیچ آؤٹ ہوگئے۔

ٹاس کے بعد بات کرتے ہوئے کپتان بابر اعظم  نے کہا کہ   میچ میں بہترین پرفارم کرنےکی کوشش کریں گے، ماضی ماضی ہے آج کے میچ پر فوکس ہے، بھارت کے خلاف میچ کے لیے بہت حوصلہ ملتا ہے۔انہوں ںے بتایا کہ قومی ٹیم میں آج ایک تبدیلی کی گئی ہے اور  اعظم خان کی جگہ عماد وسیم کو شامل کیا گیا ہے۔

بھارتی ٹیم کے کپتان روہت شرما نے کہا کہ    اچھا اسکور کرنے کی کوشش کریں گے تاکہ بولرز دفاع کر سکیں، یہاں دو تین میچز کھیل چکے ہیں، اندازہ ہے یہاں کتنا اسکور ہونا چاہیے۔

واضح رہے کہ  بارش کے باعث ٹاس تاخیر سے ہوا اور میچ بھی آدھے گھنٹے تاخیر سے پاکستانی وقت کے مطابق رات 8 بجے شروع ہوگا۔

جیت کیلئے پوری ٹیم کو جان مارنی ہو گی: ہیڈ کوچ

نیویارک سٹیڈیم میں پریس کانفرنس کرتے ہوئے قومی ٹیم کے ہیڈ کوچ گیری کرسٹن کا کہنا تھا کہ بھارت کے خلاف میچ کیلئے ابھی پلیئنگ الیون کو فائنل نہیں کیا، البتہ پاکستانی کرکٹرز بہت باصلاحیت ہیں اور انہوں نے بھارت کیخلاف جیت پر فوکس کیا ہوا ہے، گزشتہ میچ میں کی جانے والی غلطیوں پر لڑکوں نے کام کیا ہے اور امید ہے وہ دوبارہ نہیں ہوں گی۔

انہوں نے مزید کہا ہے کہ بھارت کے خلاف ایک نیا میچ ہے اور ہم اچھی پلاننگ کے ساتھ میدان میں اتریں گے، میچ میں فتح حاصل کرنے کیلئے بیٹنگ، باؤلنگ اور فیلڈنگ بہت اہم ہے، کسی کی انفرادی پرفارمنس نہیں بلکہ جیت کیلئے پوری ٹیم کو جان مارنی ہوگی۔