(ویب ڈیسک ) ترجمان دفتر خارجہ کے مطابق کشتی میں 63 پاکستانی سوار تھے ، 16 کی لاشیں نکال لی گئیں ہیں۔
اس حوالے ترجمان دفتر خارجہ کا کہنا ہے کہ لیبیا کے ساحل پر کشتی الٹنے کی خبر کے بعد طرابلس میں پاکستانی سفارتخانے کی ٹیم نے زاویہ شہر کا دورہ کیا ، پاکستانی سفارتخانہ ٹیم نے مقامی حکام اور زاویہ ہسپتال سے ملاقات کے بعد معلومات اکٹھی کر لیں۔
ترجمان دفتر خارجہ نے بتایا کہ غیر مصدقہ اطلاعات کے مطابق کشتی میں 63 پاکستانی سوار تھے، اب تک 16 لاشیں نکالی جا چکی ہیں ، لاشوں کی پاکستانی شہریت کی بنیاد پر شناخت کی گئی ہے۔
ترجمان دفتر خارجہ نے مزید کہا کہ حادثے میں 37 لوگ زندہ بچ گئے ہیں ، زخمیوں میں 1 ہسپتال میں اور 33 پولیس کی تحویل میں ہے، اطلاعات کے مطابق اس حادثے میں 10 کے قریب پاکستانی لاپتہ ہیں۔
ترجمان کا کہنا تھا کہ زندہ بچ جانے والوں میں سے 3 طرابلس میں ہیں ، سفارت خانہ بچ جانے والوں کی دیکھ بھال کر رہا ہے، طرابلس میں سفارت خانہ مزید معلومات اکٹھا کرنے اور مقامی حکام سے رابطہ برقرار رکھنے کے عمل میں ہے۔