ویب ڈیسک: یوکرین نے کہا ہے کہ وہ امریکہ کی تجویز کردہ ابتدائی 30 روزہ جنگ بندی کو قبول کرنے کے لیے تیار ہے، یہ اعلان ایک مشترکہ بیان میں کیا گیا۔
تفصیلات کےمطابق امریکہ نے ایک 30 دن کی عارضی جنگ بندی کی تجویز دی ہے تاکہ دونوں فریق امن مذاکرات کا آغاز کر سکیں، یوکرین نے اس جنگ بندی کو قبول کرنے کا عندیہ دیا ہے،ابھی تک روس کی طرف سے اس تجویز پر کوئی باضابطہ ردعمل سامنے نہیں آیا ہے۔
واشنگٹن نے فوری طور پر یوکرین کے ساتھ انٹیلی جنس شیئرنگ اور "سیکیورٹی معاونت" بحال کرنے کا اعلان کر دیا کیا، انٹیلی جنس شیئرنگ کی بحالی پر امریکہ دوبارہ یوکرین کو روسی فوجی نقل و حرکت اور دیگر حساس معلومات فراہم کرے گا۔
اس میں جدید دفاعی ساز و سامان، ڈرونز، اور دیگر فوجی مدد شامل ہو سکتی ہے، یہ فیصلہ یوکرین کے 30 روزہ جنگ بندی معاہدے کو قبول کرنے کے بعد سامنے آیا ہے۔
امریکی وزیر خارجہ مارکو روبیو کا کہنا تھا کہ امریکہ نے یوکرین کے لیے 30 روزہ جنگ بندی کی پیشکش کر دی ہے اور اب ماسکو کو فیصلہ کرنا ہوگا، انہوں نے اعلان کیا کہ وہ یہ پیشکش ماسکو لے کر جائیں گے تاکہ روسی قیادت اس پر غور کرے۔
یہ پیشکش سعودی عرب میں امریکہ اور یوکرین کے درمیان ہونے والے مذاکرات کے بعد سامنے آئی ہے، جہاں جنگ کے خاتمے پر تبادلہ خیال کیا گیا۔