محسن نقوی کی ڈبلن میں قومی کھلاڑیوں سےملاقات

کیپشن: محسن نقوی کی ڈبلن میں قومی کھلاڑیوں سےملاقات

پبلک نیوز:(شکیل خان)چئیرمین پاکستان کرکٹ بورڈ محسن نقوی  نے ڈبلن میں قومی کرکٹ ٹیم کے کھلاڑیوں سے ملاقات کی،2 گھنٹے تک جاری رہنے والی ملاقات میں محسن نقوی نے کھلاڑیوں کا حوصلہ بڑھایا جبکہ حکمت عملی پر بھی تفصیلی مشاورت ہوئی۔

تفصیلات کے مطابق  محسن نقوی نے کھلاڑیوں کو محنت، جذبے اور پروفیشنل اپروچ کے ساتھ کھیلنے کی تلقین کی۔ محسن نقوی کا کہنا تھا کہ ٹی ٹوئنٹی کرکٹ یکسر مختلف اور جارحانہ اپروچ کی حامل ہے، ٹی ٹوئنٹی کرکٹ کے جدید و نئے انداز کے مطابق کھیل کر ہی جیت ممکن ہوگی، کمرے میں بیٹھ کر حکمت عملی ترتیب دی جا سکتی ہے لیکن اصل امتحان میدان میں ہوتا ہے، جہاں پرفارمنس نظر آنی چاہیے۔

چیئرمین پی سی بی نے کہا کہ بلاشبہ تمام کھلاڑی باصلاحیت، پروفیشنل اور بہترین ہیں، قومی ٹیم کا باؤلنگ اٹیک شاندار ہے، فیلڈنگ پر بہت توجہ کی ضرورت ہے تاکہ مخالف ٹیم کو کوئی بھی چانس نہ مل سکے۔

 ان کا کہنا تھا کہ کھلاڑی پاکستان کیلئے امید ہیں اور آپ نے قوم کی توقعات پر پورا اترنا ہے، فتح کیلئے ٹیم ورک بنیادی چیز ہے، 11 کھلاڑی ایک ہو کر پاکستان کے لئے جان لڑا دیں گے تو کامیابی قدم چومے گی۔

محسن نقوی نے مزید کہا کہ پاکستانی قوم کرکٹ سے محبت کرتی ہے اور قوم کو اپنے کھلاڑیوں سے امیدیں ہیں، آخری بال تک مقابلہ کریں، مقابلہ ہوتا دکھائی دینا چاہیے، آئرلینڈ سے پہلے میچ میں شکست کو کوئی بھی قبول نہیں کر رہا،آئرلینڈ اور انگلینڈ کے بعد اصل امتحان ورلڈکپ ہے۔

اسپورٹس رپورٹر

 محمد شکیل خان ایک نوجوان اسپورٹس رپورٹر ہیں جو نہ صرف فیلڈ میں متحرک ہیں بلکہ دنیا بھر میں ہونے والے اسپورٹس ایونٹس اور خصوصا کرکٹ کے حوالے سے اپنے قارئین کو باخبر رکھا اپنا اولین فرض سمجھتے ہیں۔