(ویب ڈیسک ) سابق وزیر اعظم نواز شریف نے کہا ہےکہ پی ٹی آئی نے اپنے دور میں کوئی ایک منصوبہ دیا ہے تو دکھا دیں، بدقسمتی سے بدتمیزی کے کلچرل کو فروغ دیا گیا اور نوجوانوں کو گاڑیوں کے پیچھے بھاگنے پر لگا دیا گیا۔
نواز شریف وزیر اعلیٰ پنجاب مریم نواز کے ہمراہ جینیوا سے لندن پہنچے۔انہوں نے صحافیوں سے گفتگو کرتے ہوئے کہا کہ پاکستان تمام ممالک کے ساتھ اچھے تعلقات چاہتا ہے لہٰذا بھارت کو چیمپئنز ٹرافی کیلیے پاکستان ضرور آنا چاہیے۔
سابق وزیر اعظم نے پاکستان تحریک انصاف پر تنقید کرتے ہوئے کہا کہ پاکستان کی معیشت میں بہتری آنا شروع ہوگئی ہے، وزیر اعظم شہباز شریف نے معیشت کی بہتری کیلئے بے پناہ اقدامات کیے۔ پی ٹی آئی نے اپنے دور میں کوئی ایک منصوبہ دیا ہے تو دکھا دیں، بدقسمتی سے بدتمیزی کے کلچرل کو فروغ دیا گیا اور نوجوانوں کو گاڑیوں کے پیچھے بھاگنے پر لگا دیا گیا۔
وزیر اعلی پنجاب مریم نواز نے کہا کہ پنجاب میں اسموگ کا مسئلہ راتوں رات حل نہیں ہو سکتا، اسموگ کا مسئلہ چند سال میں حل کر دیں گے۔انہوں نے کہا کہ 6 سے 7 سال بعد پاکستان میں اب دوبارہ ترقی آ رہی ہے۔