پاکستان کو اس بار قرض پروگرام پر پوری لگن سے عمل کرنا ہوگا،ایم ڈی آئی ایم ایف

عالمی مالیاتی فنڈ ( آئی ایم ایف) کی مینیجنگ ڈائریکٹر (ایم ڈی) کرسٹالینا جارجیوا نے کہا ہے کہ پاکستان کو اس پروگرام پر پوری لگن سے عمل کرنا ہوگا، ماضی میں قرض پروگرام کی پالیسیوں پرعملدرآمد نہ ہونے سے ہی مہنگائی میں اضافہ ہوا ہے۔ ایک بیان میں ایم ڈی آئی ایم ایف نے بتایا کہ قرض پروگرام کی پالیسیوں پر عمل نہ ہونے کے باعث ہی پاکستان کے اندرونی اور بیرونی مالی ذخائرمیں کمی آئی ہے، پالیسیوں پر تسلسل سے عملدرآمد کے ذریعے ہی عدم توازن دور ہوگا۔ انہوں نے کہا کہ نیا اسٹینڈ بائے ارینجمنٹ پروگرام پاکستان کیلئے میکرو اکنامک استحکام لانےکا موقع ہے۔ ایم ڈی آئی ایم ایف نے بجلی کی قیمت اور لاگت میں توازن لانے پر زور دیتے ہوئےکہا کہ پاکستان کو توانائی کے شعبے میں اصلاحات کی ضرورت ہے، پاور سیکٹر میں ٹارگٹڈ سبسڈی بہتر بنانے کی ضرورت ہے۔ ایم ڈی آئی ایم ایف نے بینکنگ سسٹم کی سخت نگرانی اور اداروں کی استعدادکار بہتر بنانے کا مطالبہ کرنے کے ساتھ پالیسی ریٹ میں حالیہ اضافےکا خیر مقدم کیا ہے۔ واضح رہےکہ عالمی مالیاتی فنڈ کے ایگزیکٹو بورڈ نے پاکستان کا 3 ارب ڈالرز قرض پروگرام منظور کرلیا ہے۔ آئی ایم ایف کے ایگزیکٹو بورڈ نے پاکستان کے ساتھ اسٹینڈ بائے معاہدے کی منظوری دے دی ہے جس کے بعد فوری طور پر ایک ارب 20 کروڑ ڈالرز کی قسط پاکستان کو جاری کردی جائے گی۔ اعلامیے میں بتایا گیا ہے کہ 1.8 ارب ڈالر نومبر اور فروری میں دوبارہ جائزوں کے بعد شیڈول کیے جائیں گے، پاکستان کو طے شدہ پالیسیوں پر سختی سے کاربند رہنا ہوگا، پاکستان میں معاشی اصلاحاتی پروگرام معیشت کو فوری سہارا دینے کے لیے ہے، پروگرام سے پاکستان کی معیشت کو اندرونی اور بیرونی عدم توازن کو دور کرنے میں مدد ملےگی۔