(ویب ڈیسک)چینی روبوٹکس کمپنی یونٹری (Unitree )نے حال ہی میں GD01 نامی دنیا کا پہلا “پروڈکشن ریڈی” ٹرانسفارم ہونے والا میکا روبوٹ متعارف کرا دیا ہے، جس کی ابتدائی قیمت 6 لاکھ 50 ہزار امریکی ڈالر رکھی گئی ہے۔
یونٹری پہلے ہی چین کی ہیومنائیڈ روبوٹ ٹیکنالوجی میں نمایاں مقام رکھتی ہے اور ایسے جدید روبوٹس تیار کر چکی ہے جو فائٹنگ اسپورٹس میں حصہ لینے یا حیرت انگیز کرتب دکھانے کی صلاحیت رکھتے ہیں۔ تاہم اس بار کمپنی نے سب کو حیران کرتے ہوئے GD01 پیش کیا، ایک حقیقی میکا روبوٹ جسے انسان خود اندر بیٹھ کر چلا سکتا ہے۔
سائنس فکشن فلموں اور اینیمی کے شائقین برسوں سے ایسے “گنڈام” یا “Pacific Rim” طرز کے میکا سوٹس کا خواب دیکھ رہے تھے، اور اب لگتا ہے کہ وہ خواب حقیقت بننے کے قریب ہے۔ اگرچہ اس سے پہلے بھی حقیقی میکا بنانے کی کوششیں ہوئیں، مگر یونٹری کا GD01 اب تک کا سب سے جدید اور متاثرکن ماڈل سمجھا جا رہا ہے۔
چینی سوشل میڈیا پر وائرل ہونے والی ویڈیو میں کمپنی کے سی ای او وانگ زنگ زنگ( Wang Xingxing )کو GD01 کے اندر بیٹھ کر اسے چلاتے، حرکت کرتے اور دیواریں توڑتے دیکھا جا سکتا ہے۔ اگرچہ روبوٹ کی مکمل صلاحیتیں ابھی ظاہر نہیں کی گئیں، لیکن یہ اب تک کا سب سے طاقتور اور جدید میکا معلوم ہوتا ہے۔
تقریباً 2.7 میٹر اونچا یہ میکا روبوٹ، انسانی آپریٹر سمیت، تقریباً 500 کلوگرام وزن رکھتا ہے۔ یہ ایک بٹن دبانے پر دو ٹانگوں والے (bipedal) موڈ سے چار ٹانگوں والے (quadrupedal) موڈ میں تبدیل ہو سکتا ہے۔
یونٹری کے مطابق GD01 دنیا کا پہلا ایسا انسان بردار میکا ہے جو بڑے پیمانے پر پیداوار کے لیے تیار کیا گیا ہے۔ اس کی قیمت 39 لاکھ چینی یوآن (تقریباً 6 لاکھ 50 ہزار ڈالر) رکھی گئی ہے، جسے بہت سے لوگوں نے عام صارفین کی پہنچ سے باہر قرار دیا ہے۔ تاہم کمپنی کا کہنا ہے کہ وہ لاگت کم کرنے اور پیداوار بہتر بنانے پر کام کر رہی ہے تاکہ مستقبل میں قیمت کم کی جا سکے۔
اگرچہ GD01 کی باضابطہ فروخت کی تاریخ ابھی سامنے نہیں آئی، لیکن اس نے دنیا بھر میں زبردست توجہ حاصل کر لی ہے۔ کچھ لوگ اپنے ذاتی “گنڈام” جیسا روبوٹ چلانے کے خیال سے بے حد پرجوش ہیں، جبکہ بعض افراد نے اس کے عملی استعمال، اندر داخل ہونے کے طریقے اور بیٹری لائف جیسے مسائل پر سوالات اٹھائے ہیں۔