ویب ڈیسک : پاکستان شاہینز کی ٹیم، جو ڈارون، آسٹریلیا میں دو ون ڈے میچوں اور ٹاپ اینڈ نامی ٹی ٹوئنٹی سیریز کھیلنے کے لیے موجود ہے، کی قیادت کے لیے محمد حارث کو کپتان مقرر کر دیا گیا ہے۔
یہ دورہ 4 سے 18 اگست تک جاری رہے گا جس میں ٹیم دو 50 اوور کے میچوں کے علاوہ نو ٹیموں کی ٹی ٹوئنٹی سیریز میں حصہ لے گی۔
محمد حارث کی قیادت میں پاکستان شاہینز نے حالیہ کولمبو میں منعقدہ اے سی سی مینز ایمرجنگ ایشیا کپ 2023 ءمیں شاندار کارکردگی کا مظاہرہ کیا تھا۔ اس ٹورنامنٹ کے فائنل میں پاکستان شاہینز نے بھارت کو 128 رنز سے شکست دے کر ٹائٹل کا کامیابی سے دفاع کیا تھا۔
پاکستان شاہینز پہلے ہی ڈارون میں موجود ہے جہاں وہ بنگلہ دیش اے کے خلاف دو چار روزہ میچ کھیل رہی ہے۔
یہ میچ 19 سے 22 جولائی اور 26 سے 29 جولائی تک جاری رہیں گے۔ اس کے بعد ٹیم 4 اگست کو ناردن ٹیریٹری (این ٹی) اور 6 اگست کو بنگلا دیش اے کے خلاف 50 اوور کے میچ کھیلے گی۔
ٹاپ اینڈ ٹی ٹوئنٹی سیریز 9 اگست سے شروع ہوگی جس میں پاکستان شاہینز کے علاوہ اے سی ٹی کومیٹس، بنگلا دیش اے، میلبرن رینیگیڈز، میلبرن اسٹارز، پرتھ اسکارچرز، ناردرن ٹیریٹری سٹرائک، ایڈیلیڈ سٹرائکرز اور تسمانیہ کی ٹیمیں حصہ لیں گی۔
پاکستان شاہینز مسلسل دوسرے سال اس ٹی ٹونٹی سیریز میں شرکت کرے گی۔ پچھلے سال ٹیم کو فائنل میں این ٹی سٹرائک کے ہاتھوں 46 رنز سے شکست کا سامنا کرنا پڑا تھا۔
تاہم، ون ڈے میچوں میں ٹیم نے شاندار کارکردگی دکھاتے ہوئے پاپوا نیوگنی کو 224 رنز سے اور ناردرن سٹرائک کو 84 رنز سے ہرایا تھا۔
اس سال وائٹ بال کے میچز کے لیے ریڈ بال سائیڈ میں سات تبدیلیاں کی گئی ہیں۔
نئے شامل کیے گئے کھلاڑیوں میں عبد الفصیح، عرفات منہاس، عارف یعقوب، جہانداد خان، محمد حارث، محمد عمران جونیئر اور عثمان خان شامل ہیں، جو کامران غلام، خرم شہزاد، مہران ممتاز، محمد علی، مبصر خان، طیب طاہر اور عمر امین کی جگہ ٹیم کا حصہ بنے ہیں۔
محمد حارث کے کپتانی میں اسکواڈ میں شامل کھلاڑیوں کی فہرست میں عبد الفصیح، عرفات منہاس، عارف یعقوب، فیصل اکرم، حسیب اللہ (وکٹ کیپر)، محمد عرفان خان، جہانداد خان، کاشف علی، محمد حریرہ، محمد عمران جونیئر، عمیر بن یوسف، صاحبزادہ فرحان، شاہنواز دھانی اور عثمان خان شامل ہیں۔
پلیئر سپورٹ اسٹاف میں عبدالرحمن (ہیڈ کوچ)، محمد مسرور (اسسٹنٹ کوچ/منیجر)، محمد اسد (فزیو تھراپسٹ)، عمران اللہ (ٹرینر) اور عثمان ہاشمی (انالسٹ) شامل ہیں۔
یہ دورہ نا صرف پاکستانی کھلاڑیوں کو بین الاقوامی تجربہ فراہم کرے گا بلکہ انہیں اپنی صلاحیتوں کو بہتر بنانے کا موقع بھی دے گا۔
محمد حارث کی قیادت میں ٹیم سے بہتر کارکردگی کی توقع ہے اور امید ہے کہ وہ اپنے پچھلے سال کی کارکردگی کو دوہرائیں گے۔
پاکستان شاہینز کی ٹیم ایک مضبوط اور متوازن اسکواڈ کے ساتھ میدان میں اترے گی جس سے شائقین کرکٹ کو بہترین میچز دیکھنے کو ملیں گے۔