(ویب ڈیسک) جنوبی افریقہ کی حکمراں پارٹی افریقن نیشنل کانگریس (اے این سی) کے لیڈر سیرل رامافوسا کو اگلے پانچ سال کے لیے ملک کا صدر منتخب کر لیا گیا۔
تفصیلات کے مطابق جنوبی افریقہ کی حکمراں پارٹی افریقن نیشنل کانگریس (اے این سی) کے لیڈر سیرل رامافوسا کو جمعہ کے روز قومی اسمبلی نے اگلے پانچ سال کے لیے ملک کا صدر منتخب کر لیا۔ قومی اسمبلی کی پہلی نشست کی صدارت کرنے والے چیف جسٹس ریمنڈ زونڈو نے اعلان کیا کہ رامافوسا کو صدارتی انتخاب جیتنے کے لیے 283 ووٹ حاصل ہوئے، جب کہ دوسرے نامزد امیدوار جولیس ملیما کو 44 ووٹ ملے۔
صدر کے طور پر دوبارہ منتخب ہونے کے بعد اپنے پہلے خطاب میں، رامافوسا نے کہا کہ انہوں نے اپنے دوبارہ انتخاب کو ایک عظیم ذمہ داری کے طور پر قبول کیا۔ وہ ان لوگوں کے ساتھ بھی کام کرے گا جنہوں نے ان کا ساتھ نہیں دیا۔ انہوں نے کہا کہ مئی کے آخر میں ہونے والے عام انتخابات کے نتائج نے واضح کر دیا ہے کہ ملک کے عوام اپنے لیڈروں سے مل کر کام کرنے کی توقع رکھتے ہیں۔
رامافوسا نے کہا ’’ہمارے لوگ اپنے ووٹوں کے ذریعے امید کرتے ہیں کہ غیر نسل پرستی اور غیر جنس پرستی پر مبنی، امن و انصاف پر مبنی جمہوری معاشرے کے مقاصد حاصل کرنے کے لئے؛ استحکام کو یقینی بنانے اور غربت، بے روزگاری اور عدم مساوات کے ٹریپل چیلنجوں سے نمٹنے اور سب کے لیے خوشحالی حاصل کرنے کے لئے، تمام جماعتیں آئین کے فریم ورک کے اندر مل کر کام کریں گی۔‘‘
71 سالہ رامافوسا نے زور دے کر کہا کہ متعدد جماعتوں کے اتفاق رائے سے بننے والی قومی اتحاد کی حکومت ’دو یا تین جماعتوں کا بڑا اتحاد نہیں ہے۔‘‘