ویب ڈیسک: چین کے شمال مشرقی صوبے ہیلونگ جیانگ میں واقع ہینگ داؤ حے زی ایک دلکش اور منفرد قصبہ ہے جو سردیوں میں برف کی سفید چادر اوڑھ کر کسی خواب ناک منظر کا روپ دھار لیتا ہے۔ اپنی قدرتی خوبصورتی کے ساتھ ساتھ یہ قصبہ اپنی انوکھی تاریخ کی وجہ سے بھی دنیا بھر کے سیاحوں کی توجہ حاصل کر رہا ہے۔
مقامی افراد ہینگ داؤ حے زی کو محبت سے ’’ ریل گاڑیوں سے جنم لینے والا قصبہ‘‘ قرار دیتے ہیں۔ اس کی بنیاد انیسویں صدی کے آخر میں اس وقت رکھی گئی جب روسی ماہرین نے چینی ایسٹرن ریلوے کی تعمیر کے دوران یہاں ٹرینوں کی مرمت کے کارخانے اور دیگر سہولیات قائم کیں۔ وقت کے ساتھ یہ علاقہ ایک چھوٹے ریلوے مرکز سے ایک مکمل اور آباد قصبے میں تبدیل ہو گیا۔
آج ہینگ داؤ حے زی کی سب سے نمایاں پہچان اس کی محفوظ تاریخی عمارتیں ہیں، جن میں یورپی طرزِ تعمیر کی واضح جھلک دکھائی دیتی ہے۔ پرانی اینٹوں سے بنی عمارتیں، لکڑی کے دروازے اور برف سے ڈھکی سڑکیں سیاحوں کو ایک الگ ہی زمانے میں لے جاتی ہیں۔
قصبے میں قائم چائنیز ایسٹرن ریلوے میوزیم سیاحوں کی خاص توجہ کا مرکز ہے، جہاں لوگ تصاویر بناتے اور ریلوے کی تاریخ سے جڑی دلچسپ کہانیوں سے آگاہ ہوتے ہیں۔ سردیوں کے موسم میں بچے برف پر کھیلتے اور سنو ٹیوبنگ سے لطف اندوز ہوتے ہیں، جبکہ بڑے اس پرسکون اور حسین ماحول سے محظوظ ہوتے نظر آتے ہیں۔
ہینگ داؤ حے زی اب محض ایک تاریخی قصبہ نہیں بلکہ چین کے ان مقامات میں شامل ہو چکا ہے جہاں لوگ سکون، قدرتی حسن اور ماضی کی خوشبو ایک ساتھ محسوس کرنے آتے ہیں، یہی وجہ ہے کہ یہ خوبصورت قصبہ تیزی سے ایک مقبول سیاحتی مقام بنتا جا رہا ہے۔