(ویب ڈیسک ) نوجوان پائلٹس کیلئے وزیر اعلیٰ بلوچستان نے وائی پی ڈی پی – 1 پروگرام کا آغاز کردیا ہے۔
تفصیلات کے مطابق وزیر اعلیٰ بلوچستان نے 21 نومبر 2024 کو ایک اعلیٰ سطحی اجلاس میں ایوی ایشن وژن کا اعلان کیا، جس میں صوبے کے نوجوان پائلٹس کی پیشہ ورانہ ترقی اور صلاحیتوں کے فروغ پر زور دیا گیا۔
بلوچستان میں ہوابازی کے شعبے سے وابستہ نوجوانوں کو کمرشل پائلٹ لائسنس (CPL) حاصل کرنے کے بعد روزگار کے محدود مواقع کا سامنا کرنا پڑتا ہے، جس کے باعث وہ اس شعبے میں کیریئر بنانے سے گریز کرنے لگے ہیں۔ اس صورتحال نے بلوچستان کے نوجوانوں اور دیگر صوبوں کے پائلٹس کے درمیان ایک واضح فرق پیدا کر دیا ہے۔
اس خلا کو پر کرنے کے لیے، وزیر اعلیٰ بلوچستان نے ایک انقلابی اقدام کا آغاز کیا ہے، جس کا مقصد بلوچستان کے نوجوانوں میں ہوابازی کے شعبے میں دلچسپی کو دوبارہ فروغ دینا ہے۔ یہ وژنری پروگرام نوجوان پائلٹس کو قومی اور بین الاقوامی سطح پر مسابقت کے لیے درکار تجربہ اور مہارت فراہم کرنے کا موقع دے گا، تاکہ وہ کمرشل ایئر لائنز میں بطور پیشہ ور پائلٹ اپنی صلاحیتوں کا لوہا منوا سکیں۔
اس اقدام کے ذریعے، ان نوجوانوں کے لیے ایک نئی امید پیدا ہوگی جو ہوابازی کے شعبے میں کیریئر بنانے کے خواہشمند تھے لیکن محدود مواقع کی وجہ سے مایوسی کا شکار تھے۔
وزیر اعلیٰ کے اس وژن کو عملی جامہ پہنانے کے لیے، حکومت بلوچستان کے ایوی ایشن ونگ نے "نوجوان پائلٹ ترقیاتی پروگرام (YPDP-1)" کا آغاز کیا ہے، جو بلوچستان کے مقامی/ڈومیسائل رکھنے والے پائلٹس کے لیے مخصوص ہے۔
اس انقلابی اقدام کے تحت، سات منتخب پائلٹس کو آئندہ دو سالوں میں پاکستان کے پہلے رجسٹرڈ سیسنا 208B ٹربوپروپیلر طیارے پر 200 اضافی فلائٹ آورز کا تجربہ فراہم کیا جائے گا۔ مزید برآں، اس پروگرام میں شامل ہونے والے پائلٹس کو وظیفہ (اسٹائپینڈ) بھی دیا جائے گا، تاکہ ان کی تربیت کے دوران مالی معاونت یقینی بنائی جا سکے۔
یہ تاریخی اقدام پاکستان میں کسی بھی صوبائی حکومت کی جانب سے ہوابازی کے شعبے میں مقامی انسانی وسائل کی ترقی کا پہلا اور سنگ میل ثابت ہونے والا قدم ہے۔ نوجوان پائلٹ ترقیاتی پروگرام (YPDP-1) بلوچستان میں ہوابازی کے مستقبل کی تشکیل میں ایک اہم کردار ادا کرے گا اور طویل المدتی بنیادوں پر صوبے میں ایوی ایشن انڈسٹری کے فروغ اور ترقی میں مددگار ثابت ہوگا۔