(ویب ڈیسک ) پاکستان کرکٹ ٹیم کے سابق کپتان شاہد آفریدی بھی پنجاب پولیس کے فلاحی اقدامات کے مداح نکلے۔
تفصیلات کے مطابق شاہد آفریدی نے سابق لیگ سپنر مشتاق احمد کے ہمراہ پولیس اینیمل ریسکیو سنٹر گلبرگ کا دورہ کیا۔ شاہد آفریدی نے ریسکیو کئے گئے جانوروں کو سنٹر میں فراہم کی جانے والی سہولیات کا جائزہ لیا۔
شاہد آفریدی نے پولیس اینیمل ریسکیو سنٹر کو بے سہارا، زخمی اور بیمار جانوروں کے علاج و بحالی کیلئے مثالی پراجیکٹ قرار دیا اور کہا کہ خدمت خلق کے اس اہم سنگ میل اینیمل ریسکیو سنٹر کو ورکنگ میں ہر ممکن سپورٹ فراہم کریں گے۔
معروف کرکٹر شاہد آفریدی بھی پنجاب پولیس کے فلاحی اقدامات کے مداح۔ شاہد آفریدی کا سابق لیگ سپنر مشتاق احمد کے ہمراہ پولیس اینیمل ریسکیو سنٹر (PARC) گلبرگ کا دورہ، ریسکیو کئے گئے جانوروں کو پی اے آر سی میں فراہم کی جانے والی سہولیات کا جائزہ لیا۔ اے ایس پی سیدہ شہربانو نقوی اور جے… pic.twitter.com/37buNptfTB
— Punjab Police Official (@OfficialDPRPP) March 17, 2024
اس موقع پر اے ایس پی سیدہ شہربانو نقوی اور جے ایف کے کی سی ای او ذوفشاں انوشے نے شاہد آفریدی کو اینیمل ریسکیو سنٹر بارے بریفنگ دی۔
اے ایس پی شہربانو نقوی نے کہا کہ لاہور، گوجرانوالہ اور راولپنڈی میں پنجاب پولیس کے اینیمل ریسکیو سنٹرز(PARC) فعال ہیں، پولیس اینیمل ریسکیو سنٹرز پنجاب پولیس اور جانوروں کے حقوق کیلئے سرگرم تنظیم کے اشتراک سے قائم کئے گئے ہیں، پولیس اینیمل ریسکیو سنٹرز میں ویٹرنری ڈاکٹرز، ایمبولینس، ریسکیو سٹاف، پولیس ٹیم موجود ہیں۔
شاہد آفریدی نے کہا کہ پولیس اینیمل ریسکیو سنٹر بے سہارا، زخمی جانوروں کے علاج معالجے و بحالی میں اہم کردار ادا کر رہا ہے، دیگر صوبوں کو پولیس فورسز اور اداروں کو پنجاب پولیس اینیمل ریسکیو سنٹر جیسے ادارے بنانے چاہئیں۔
شاہد آفریدی نے مشتاق احمد کے ہمراہ سپیشل انیشیٹو پولیس اسٹیشن گلبرگ کا بھی دورہ کیا، اے ایس پی گلبرگ سیدہ شہربانو نے شاہد آفریدی کو سپیشل انیشئیٹو پولیس سٹیشن، سائبان دفتر کی ورکنگ بارے آگاہ کیا۔
شاہد آفریدی نے کہا کہ تھانوں اور پبلک سہولیات مراکز کی اپ گریڈیشن شہریوں کو خدمات کی فراہمی کیلئے پنجاب پولیس کا احسن اقدام ہے۔