ویب ڈیسک: شدید بارشوں اور ممکنہ سیلابی صورتحال کے پیش نظر آزادکشمیر کے ضلع باغ میں تمام تعلیمی ادارے بند رکھنے کا فیصلہ کیا گیا ہے۔ اس حوالے سے جاری نوٹیفکیشن کے مطابق ادارے آج اور کل طلبہ و اساتذہ کے لیے مکمل طور پر بند رہیں گے۔
تفصیلات کے مطابق محکمہ موسمیات نے آزادکشمیر سمیت بالائی علاقوں میں مسلسل بارشوں اور لینڈ سلائیڈنگ کے خدشے کے پیش نظر الرٹ جاری کیا تھا۔ باغ اور گردونواح میں بارشوں کے باعث برساتی نالوں میں طغیانی دیکھی گئی ہے جبکہ کئی نشیبی علاقے پانی میں گھر گئے ہیں۔ ضلعی انتظامیہ نے ہنگامی اقدامات کرتے ہوئے شہریوں کو محتاط رہنے اور غیر ضروری سفر سے گریز کرنے کی ہدایت کی ہے۔
محکمہ تعلیم آزادکشمیر کے مطابق اسکول اور کالجز بند کرنے کا فیصلہ طلبہ کی حفاظت کے لیے کیا گیا ہے کیونکہ مسلسل بارشوں سے آمد و رفت کے مسائل اور حادثات کے خدشات بڑھ گئے ہیں۔ انتظامیہ نے کہا کہ سیلابی ریلوں اور لینڈ سلائیڈنگ سے بچاؤ کے لیے شہری دریا، ندی نالوں اور پہاڑی ڈھلوانوں کے قریب جانے سے اجتناب کریں۔
مقامی ذرائع کے مطابق بارش کے بعد بعض دیہی علاقوں میں رابطہ سڑکیں متاثر ہوئی ہیں جس سے آمد و رفت معطل ہے۔ ریسکیو اداروں کو ہائی الرٹ کر دیا گیا ہے جبکہ متاثرہ علاقوں میں امدادی کارروائیاں بھی جاری ہیں۔ ضلعی انتظامیہ نے کہا کہ حالات بہتر ہوتے ہی تعلیمی ادارے دوبارہ کھول دیے جائیں گے۔
یاد رہے کہ گزشتہ روز محکمہ موسمیات نے ملک بھر میں مون سون کی شدت بڑھنے اور آزادکشمیر، خیبرپختونخوا اور شمالی پنجاب میں طوفانی بارشوں کا خدشہ ظاہر کیا تھا، جس کے بعد متعلقہ محکموں کو ہنگامی بنیادوں پر الرٹ کر دیا گیا ہے۔