ویب ڈیسک: سپریم کورٹ نے ڈاکٹر عبدالقدیرٹرسٹ اسپتال کی جعلی ٹرسٹ ڈیڈ کیس میں ملزم کو ٹرسٹ ڈیڈ جمع کرانے کی مہلت دیتے ہوئے ریمارکس دیئے کہ اگر کل تک ڈیڈ عدالت میں جمع نہیں ہوتی تو فیصلہ دیدیں گے۔
تفصیلات کے مطابق ڈاکٹر عبدالقدیرٹرسٹ اسپتال کیس کی جعلی ٹرسٹ ڈیڈ کے ملزم کی ضمانت قبل از گرفتاری پر سماعت چیف جسٹس یحییٰ آفریدی کی سربراہی میں سپریم کورٹ کے 2 رکنی بینچ نے کی۔
وکیل صفائی نے موقف اپنایا کہ ٹرسٹ میں ہونے والے اقدامات سے ملزم محمدسعید کا کوئی تعلق نہیں، ملزم کے کسی دستاویز پر دستخط نہ کوئی عملی کردار ہے۔
پراسیکیوٹر نے عدالت کو بتایا کہ ٹرسٹ ڈاکٹر عبدالقدیر نے اپنی زندگی میں بنایا تھا، ٹرسٹ میں قیصر امین کو شامل کرنے پر ڈاکٹر صاحب دیگر ٹرسٹیز سے ناراض ہوئے، انہوں نے اپنی زندگی میں ہی ستمبر 2021 میں ٹرسٹ اپنی بیٹی کے حوالے کردیا تھا۔
پراسیکیوٹر نے کہا کہ اکتوبر 2021 کو ملزمان نے جعلی ٹرسٹ ڈیڈ بنا کر اسپتال پر قبضہ کی کوشش کی،موجودہ ملزم کا جعلی ٹرسٹ ڈیڈ بنانے میں کردار ہے، ملزمان میں سے کوئی پولیس کو ٹرسٹ ڈیڈ فراہم نہیں کررہا، ملزم محمدسعید سے ٹرسٹ ڈیڈ برآمد کرنا ہے۔
سپریم کورٹ نے ملزم محمدسعید کو ٹرسٹ ڈیڈ کل تک فراہم کرنے کی ہدایت کردی۔
چیف جسٹس یحییٰ آفریدی نے ریمارکس دیئے کہ اگر ملزم محمد سعید ٹرسٹ ڈیڈ فراہم نہیں کرتا تو پھر فیصلہ کردیں گے۔
بعدازاں سپریم کورٹ نے کیس کی سماعت کل تک کیلئے ملتوی کردی۔