ویب ڈیسک:انسداد دہشت گردی عدالت راولپنڈی نے 26 نومبر کے احتجاج سے متعلق درج مقدمات میں پی ٹی آئی کے متعدد ملزمان کی ضمانتیں خارج کر دیں۔
تفصیلات کے مطابق انسداد دہشت گردی عدالت راولپنڈی میں 26 نومبر کے احتجاج سے متعلق درج مقدمات کی سماعت ہوئی، جس میں عدالت نے متعدد ملزمان کی ضمانتیں خارج کر دیں۔عدالت نے صنم جاوید، مشال یوسفزئی، جاوید کوثر، راجہ بشارت، سمابیہ طاہر، تیمور مسعود اور سمیع ابراہیم سمیت دیگر ملزمان کی ضمانتیں عدم پیروی کی بنیاد پر منسوخ کر دیں۔
ملزمان کی جانب سے عدالت میں حاضری سے استثنیٰ کی درخواست دائر کی گئی تھی۔
جس کی پراسیکیوٹر ظہیر شاہ نے سخت مخالفت کی۔ استغاثہ کے دلائل کے بعد عدالت نے حاضری سے استثنیٰ کی درخواست مسترد کرتے ہوئے تمام نامزد ملزمان کی ضمانتیں خارج کرنے کا حکم دیا۔
یاد رہے کہ 26 نومبر کو ہونے والے احتجاج کے سلسلے میں متعدد مقدمات درج کیے گئے تھے، جن میں پی ٹی آئی سے وابستہ شخصیات اور کارکنان کو شامل تفتیش کیا گیا تھا۔
عدالت نے کیس کی مزید سماعت آئندہ تاریخ تک ملتوی کر دی ہے۔