ویب ڈیسک: پاکستان نے اپنی پہلی مقامی اردو زبان کی مصنوعی ذہانت (اے آئی) ایپ ماڈل قلب (Qalb) متعارف کرا دی ہے۔
یہ ماڈل پاکستانی طالب علم تیمور حسن نے تیار کیا ہے، جو اس وقت امریکا میں زیرِ تعلیم ہیں۔ قلب کو اردو زبان کے لیے خصوصی طور پر تیار کیا گیا۔ جسے دنیا کا سب سے بڑا لارج لینگویج ماڈل (LLM) قرار دیا جا رہا ہے۔
قلب کو 1.97 ارب ٹوکنز پر تربیت دی گئی ہے، جبکہ اس کی جانچ پڑتال سات سے زائد بین الاقوامی بینچ مارکنگ فریم ورکس کے ذریعے کی گئی۔ ڈویلپرز کے مطابق یہ ماڈل حقیقی دنیا کی کارکردگی کے اہم پیمانوں پر موجود اردو پر مبنی اے آئی ماڈلز سے بہتر نتائج دیتا ہے۔
تیمور حسن ایک نوجوان کاروباری شخصیت ہیں، جو اب تک 13 اسٹارٹ اپس لانچ کر کے کامیابی سے ایگزٹ کر چکے ہیں۔ وہ مائیکروسافٹ کپ کے سابق فاتح رہ چکے ہیں اور متعدد بین الاقوامی پلیٹ فارمز پر پاکستان کی نمائندگی کر چکے ہیں۔ انہوں نے کمپیوٹر سائنس میں بیچلرز کی ڈگری فاسٹ یونیورسٹی سے حاصل کی۔
اس وقت وہ آبرن یونیورسٹی میں کمپیوٹر سائنس اور سافٹ ویئر انجینئرنگ میں ماسٹرز کی تعلیم حاصل کر رہے ہیں، جہاں وہ جدید اے آئی اور ٹیکنالوجی منصوبوں پر بھی کام کر رہے ہیں۔
دنیا بھر میں 23 کروڑ سے زائد اردو بولنے والوں کے پیشِ نظر، قلب کا مقصد اردو زبان میں جدید اے آئی صلاحیتیں فراہم کر کے ایک دیرینہ تکنیکی خلا کو پُر کرنا ہے۔ یہ ماڈل مقامی کاروباروں، اسٹارٹ اپس، تعلیمی پلیٹ فارمز، ڈیجیٹل سروسز اور وائس بیسڈ اے آئی ایجنٹس کی معاونت کے لیے ڈیزائن کیا گیا ہے۔
تیمور حسن کا کہنا ہے کہ یہ منصوبہ پاکستان کے تکنیکی مستقبل میں کردار ادا کرنے کے وسیع تر مشن کا حصہ ہے۔ انہوں نے بتایا کہ اس منصوبے پر انہوں نے اپنے انڈرگریجویٹ ساتھیوں جواد احمد اور محمد اویس کے ساتھ قریبی تعاون سے کام کیا، اور ٹیم آئندہ بھی مختلف شعبوں کے لیے مقامی نوعیت کے اے آئی ماڈلز کو بہتر بناتی رہے گی۔
ٹیم کے مطابق اب جدت صرف بڑی کارپوریشنز تک محدود نہیں رہی۔ تیمور حسن کا کہنا تھا کہ جدید ٹیکنالوجی نے چھوٹی ٹیموں کو بھی یہ موقع دے دیا ہے کہ وہ بڑے بجٹ کے بغیر ایسے ٹولز تیار کر سکیں جو تعلیم دیں، خودکار نظام بنائیں اور لاکھوں افراد کی خدمت کر سکیں۔