ویب ڈیسک: ایپل نے مصنوعی ذہانت کی صلاحیتوں کا حامل ’زبردست‘ قیمت کا نیا آئی فون متعارف کروا دیا ہے۔
آئی فون 16 ای میں وہی A18 پروسیسنگ چپ استعمال ہوئی ہے جو اس سے مہنگے آئی فون 16 کی سیریز میں استعمال ہوتی ہے۔
کمپنی کا کہنا ہے کہ اس نئے ماڈل میں بھی سٹوریج کے وہی آپشنز ہیں جو آئی فون 16 سیریز میں آتے ہیں لیکن دیگر شعبوں جیسے کیمرے میں اس کی صلاحیتیں آئی فون 16 سے کم ہیں۔
آئی فون 16 ای ایک طرح سے ایپل کی ایس ای سیریز کا جانشین ہے جو 2016 سے 2022 کے دوران متعارف کروائی گئی تھی۔
ایس ای سیریز ایپل کے فلیگ شپ فونز کا سستا ورژن ہوتے تھے۔
کمپنی نے 16 ای میں آئی فون کے کلاسک ٹچ آئی ڈی انٹرفیس کو ختم کر دیا ہے اور اس کی جگہ فیس آئی ڈی فیچر نے لے لی ہے۔
ایپل کی نئی ڈیوائس آئی فون 14 کے ڈیزائن پر بنی ہوئی ہے۔ اس میں بھی فیس آئی ڈی (اور سیلفیز) کے لیے درکار فرنٹ کیمروں کو نوچ میں فٹ کیا گیا ہے جو کمپنی کے نئے فلیگ شپ فونز ڈائنامک آئی لینڈ ڈیزائن سے مختلف ہے۔
اس فون میں 6.06 انچ کا اولیڈ (OLED) ڈسپلے ہے جو آئی فون 16 کے سٹینڈرڈ ورژن سے 0.11 انچ چھوٹا ہے۔
ایپل کے نئے فون کے بارے میں زیادہ بحث اس کی پروسیسنگ طاقت کو لے کر ہو گی۔ آئی فون 16 ای میں ایپل نے وہی A18 چپ استعمال کی ہے جو اس کے زیادہ مہنگے فلیگ شپ آلات میں استعمال ہوتی ہے۔
اس کا مطلب ہے کہ 16 ای کے صارف وہی گیمز اور دوسرے ایپس چلا سکیں گے جو دوسرے آئی فونز میں چلائی جا سکتی ہیں تاہم 16 ای میں A18 چپ کا استعمال ممکنہ طور پر اسے مصنوعی ذہانت کی صلاحیتوں کے قابل بنانے کے لیے کیا گیا۔
ایپل کے سی ای او ٹِم کُک کا کہنا ہے کہ نئے ماڈل سے صارفین کو وہی ’کارکردگی‘ ملے گی جس کی وہ ایپل سے ’امید‘ کرتے ہیں۔
ان کا کہنا ہے کہ ایپل انٹیلیجنس فیچر کی مدد سے صارفین کو ’اپنا وقت بچانے، چیزیں جلدی سے کرنے اور خود کو بہتر طریقے سے پیش کرنے‘ میں مدد ملے گی۔
ایپل کا کہنا ہے کہ اس کا نیا آئی فون ’بنایا گیا ہی ایپل انٹیلیجنس‘ کے لیے ہے۔ اس حوالے سے اس ٹیکنالوجی کی کچھ خصوصیات کی طرف اشارہ کیا جیسے کہ تصاویر کی چھانٹی کرنا یا تصویری لائبریری میں چیزوں کی تلاش کو آسان بنانا۔
دوسری فون بنانے والی کمپنیاں پہلے ہی اپنی ڈیوائسز میں ایسے فیچرز پہلے ہی متعارف کروا چکی ہیں تاہم آئی فون 16 ای ایپل کی ڈیوائسز پر مصنوعی ذہانت کی صلاحیت استعمال کرنے کا سستا ترین طریقہ ہے۔
کمپنی کا کہنا ہے کہ آئی فون 16 ای 21 فروری سے 59 ممالک میں پری آرڈر کے لیے دستیاب ہو گا۔
نئے آئی فون کی قیمت 599 ڈالرز سے شروع ہو گی جو آئی فون 16 سے 200 ڈالر کم ہے۔
اگر آئی فون 16 ای کا موازنہ 2016 میں لانچ ہونے والے آئی فون ایس ای سے کیا جائے تو یہ اس سے دگنی قیمت کا ہے۔
اس کی قیمت کو لے کر سوشل میڈیا پر کئی صارفین کا کہنا ہے کہ 599 ڈالرز کے فون کو سستا نہیں کہا جا سکتا۔
سوشل میڈیا پلیٹ فارم ایکس پر پارکر برٹن نامی صارف کا کہنا تھا کہ 599 ڈالرز کے فون کو بجٹ فون نہیں کہا جا سکتا۔
وشواروپ سمجھدار نامی صارف کا کہنا تھا کہ ’اگر آپ کو کبھی زندگی میں لگے کہ آپ کسی کام کے نہیں تو یاد رکھیے گا کہ ایپل نے آئی فون 16 ای کو ’سب سے زبردست قیمت‘ کا کہا۔‘
آئی فون 16ای میں نیا کیا ہے؟
آئی فون 16 ای کا اسکرین سائز بھی اپ گریڈ کیا گیا ہے اور اس میں تھرڈ جنریشن ایس ای ماڈل کے 4.7 انچ کے مقابلے میں 6.1 انچ کی اسکرین موجود ہے۔
کمپنی کے مطابق نئے آئی فون میں بڑی اور طاقت ور بیٹری لگائی گئی ہے جس میں 26 گھنٹے تک ویڈیو پلے بیک کی جا سکتی ہے۔
آئی فون 16 ای میں کمپنی نےفرنٹ پر نوچ ڈیزائن دیا ہے جو آئی فون 16 لائن اپ کے بجائے 13 سیریز کی طرح ہے۔لیکن کمپنی نے اس میں فیس آئی ڈی کا فیچر شامل کیا ہے۔
نئے آئی فون میں بیک پر 48 میگا پکسل کا سنگل کیمرہ موجود ہے جسے کمپنی نے 'ٹو ان ون' کیمرے کے طور پر بیان کیا ہے۔ اس کیمرے میں ٹو ایکس زوم کا فنکشن بھی موجود ہے۔
بیک کیمرے کی مدد سے 4k ویڈیوز بھی بنائی جا سکتی ہیں۔ آئی فون 16 ای میں فرنٹ کیمرہ 12 میگا پکسل کا ہے۔
ایپل کے مطابق 21 فروری سے آئی فون 16 ای کو پری آرڈر کیا جا سکتا ہے جب کہ یہ 28 فروری سے دستیاب ہو گا۔