ویب ڈیسک:چیئرمین مہاجر قومی موومنٹ آفاق احمد کی ضمانت منظور ہوتے ہی انہیں دوبارہ گرفتارکرلیا گیا ہے۔ وکیل جاوید چھتاری کے مطابق آفاق احمد کو سرجانی ٹاؤن تھانے کے مقدمے میں گرفتارکیا گیا۔
تفصیلات کے مطابق وکیل جاوید چھتاری نے میڈیا کو بتایا کہ آفاق احمد کودوبارہ گرفتارکرلیا گیا ہے، آفاق احمد کو سرجانی ٹاؤن تھانے کے مقدمے میں گرفتارکیا گیا۔
ڈمپر جلانے کے مقدمے میں مہاجر قومی موومنٹ کے چیئرمین آفاق احمد شہریوں کو اکسانے کا الزام ہے، آفاق احمد کی 2 مقامات میں اے ٹی سی نے ضمانت منظورکی تھی۔
کراچی میں انسداد دہشتگردی کی خصوصی عدالت نے اشتعال انگیزی، لانڈھی اور کورنگی میں ٹرک نذر آتش کرنے کے مقدمات میں مہاجر قومی موومنٹ کے چیئرمین آفاق احمد کی درخواست ضمانت پر فیصلہ محفوظ کیا تھا۔
آفاق احمدکی ایک ایک لاکھ روپے کے عوض ضمانت منظور کی گئی، آفاق احمد کی پیروی جاوید چھتاری ایڈووکیٹ نے کی۔
واضح رہے کہ اے ٹی سی کراچی میں مہاجر قومی موومنٹ کے چیئرمین آفاق احمد کی درخواست ضمانت پرگذشتہ روز سماعت ہوئی۔
دوران سماعت وکیل جاویدچھتاری ایڈووکیٹ نے دلائل دیتے ہوئے مؤقف اپنایا کہ آفاق احمد کے خلاف کوئی ثبوت پیش نہیں کیا گیا.
وکیل صفائی نے کہا کہ آفاق احمد نے کسی کو ڈمپر یا ٹینکر جلانے کا نہیں کہا، چیئرمین مہاجر قومی موومنٹ کو سیاسی انتقام کا نشانہ بنایا گیا ہے۔
پراسیکیوٹر نے کہا کہ آفاق احمد کے اکسانے پر مشتعل ہو کر لوگوں نے کئی گاڑیوں کو آگ لگائی، آفاق احمد کے خلاف لانڈھی اور عوامی کالونی تھانے میں دو مقدمات درج ہیں۔
بعد ازاں عدالت نے وکلا کے دلائل سننے کے بعد فیصلہ محفوظ کرلیا تھا جس پرعدالت نے آج ان کی ضمانت کی درخواست منظور کر لی۔