ویب ڈیسک: انگلینڈ کے لیجنڈری فٹبالر، سابق قومی ٹیم کے کپتان اور دو مرتبہ بیلن ڈی اور کے فاتح کیون کیگن 75 برس کی عمر میں کینسر کے باعث انتقال کر گئے۔
برطانوی میڈیا کے مطابق کیون کیگن گزشتہ کچھ عرصے سے سرطان کے مرض میں مبتلا تھے اور گزشتہ روز انتقال کر گئے۔ ان کے انتقال کی خبر سامنے آتے ہی عالمی فٹبال برادری سوگ میں ڈوب گئی، جبکہ سابق کھلاڑیوں اور مداحوں نے گہرے دکھ کا اظہار کرتے ہوئے انہیں شاندار الفاظ میں خراجِ عقیدت پیش کیا۔
کیون کیگن کو فٹبال کی دنیا میں محبت سے "کنگ کیو" کہا جاتا تھا۔ وہ اپنی غیرمعمولی قائدانہ صلاحیت، تیز رفتار کھیل اور گول اسکور کرنے کی شاندار صلاحیت کے باعث دنیا بھر میں بے حد مقبول تھے۔
انہوں نے اپنے کامیاب کیریئر کے دوران انگلینڈ کی قومی ٹیم کے علاوہ یورپ کے متعدد ممتاز کلبوں کی نمائندگی کی اور کئی یادگار کامیابیاں اپنے نام کیں۔ ان کی سب سے نمایاں انفرادی کامیابی 1978 اور 1979 میں مسلسل دو برس بیلن ڈی اور کا اعزاز حاصل کرنا تھا، جو اس دور میں کسی بھی فٹبالر کے لیے غیرمعمولی اعزاز تصور کیا جاتا تھا۔
بطور کھلاڑی شاندار کیریئر کے اختتام کے بعد کیون کیگن نے کوچنگ کے میدان میں بھی نمایاں خدمات انجام دیں۔ انہوں نے انگلینڈ کی قومی ٹیم سمیت مختلف معروف کلبوں کی کوچنگ کی اور اپنی فنی صلاحیتوں سے نئی نسل کے کھلاڑیوں کی رہنمائی کی۔
کیون کیگن کے انتقال کو فٹبال کی دنیا ایک ناقابلِ تلافی نقصان قرار دے رہی ہے، جبکہ مداح انہیں ایک ایسے عظیم کھلاڑی کے طور پر یاد کر رہے ہیں جس نے اپنی صلاحیت، قائدانہ کردار اور کھیل سے فٹبال کی تاریخ پر گہرے نقوش چھوڑے۔