(ویب ڈیسک ) بالی ووڈ کے معروف اداکار سیف علی خان کے گھر پر چوری کی کوشش کرنے والے ملزم نے واردات کرنے کی وجہ بتادی ہے۔
ملزم نے سیف علی خان کے گھر چوری کی کوشش کرنے کی وجہ بتائی ہے۔
بھارتی میڈیا رپورٹس کے مطابق ایک پولیس افسر نے بتایا، ’اس ( ملزم) نے سیف علی خان کے گھر کا انتخاب اتفاقیہ طور پر کیا۔ اس کا مقصد صرف کسی امیر شخص سے چوری کرنا اور لوٹی ہوئی رقم کے ساتھ بنگلادیش بھاگ کر اپنی بیمار ماں کی مدد کرنا تھا۔‘
پولیس افسر نے مزید بتایا کہ ’جرم کے پیچھے فوری محرک یہ تھا کہ شرف نے 15 دسمبر کو تھانے کے ایک ریسٹورنٹ میں اپنی ملازمت کھو دی تھی، کیونکہ اسکے معاہدے کی مدت ختم ہوگئی تھی۔ اس کے بعد وہ تقریباً خالی ہاتھ ہو گیا تھا۔ اس نے پولیس کو یہی بتایا ہے۔‘
خیال رہے کہ سیف علی خان کے گھر پر 16 جنوری کی رات چوری کی واردات کی ناکام کوشش ہوئی، اس دوران ملزم نے سیف علی خان کو چھریوں کے وار کرکے زخمی کردیا اور بھاگ نکلا۔
پولیس نے کارروائی کرتے ہوئے واردات کی کوشش کرنے والے ملزم کو گرفتار کرلیا جس کا نام شریف الاسلام اور تعلق بنگلادیش سے بتایا گیا۔
دوسری جانب بھارتی اداکار سیف علی خان کئی دن ہسپتال میں زیر علاج رہنے کے بعد انہیں ڈسچارج کردیا گیا ہے۔ ڈاکٹروں نے انہیں آرام کرنے کا مشورہ دیا ہے۔