ظلم کا نظام ختم نہ کیا تو ہماری آئندہ نسلوں تک جاری رہے گا: عمران خان کا پیغام

ویب ڈیسک: پاکستان تحریک انصاف (پی ٹی آئی) کے بانی چیئرمین عمران خان نے 24 نومبر کو ہر حال میں احتجاج کا اعلان کردیا ہے۔

تفصیلات کےمطابق عمران خان کی ہمشیرہ علیمہ خان نے میڈیا سے گفتگو کرتے ہوئے بتایا کہ   عمران خان نے پیغام دیا ہے کہ 24 نومبر کو پاکستانیوں کو ہر حال میں نکلنا ہے۔

علیمہ خان نے کہا، ’انہوں نے بتایا کہ مجھے ڈیڑھ سال سے انہوں نے جیل میں رکھا ہوا ہے، میرے خلاف ناجائز مقدمات بنائے، 2 بار قاتلانہ حملہ کیا جس میں مجھے 4 گولیاں لگی تھیں۔‘

علیمہ خان نے کہا کہ بانی پی ٹی آئی کہتے ہیں کہ وہ یہ اقتدار کے لیے نہیں کررہے، ہمیں اقتدار نہیں بلکہ آزادی چاہیے، پچھلے کئی سال سے آپ دیکھ رہے ہیں کہ جو لوگ اپنی آزادی کے لیے کھڑے ہونے کی کوشش کرتے ہیں، ان پر ظلم کیا جاتا ہے۔

علیمہ خان کے مطابق، عمران خان نے کہا کہ اب وقت آگیا ہے کہ آپ سمجھیں کہ اگر ظلم کا نظام آج ختم نہ کیا تو یہ صرف آج نہیں بلکہ ہماری آئندہ نسلوں تک جاری رہے گا۔‘