کم جونگ اُن  کا ٹرمپ کی فون کالز اور خط کا جواب دینے سے انکار ، ملاقات کی تازہ کوشش بھی ناکام، امریکی میڈیا

کم جونگ اُن  کا ٹرمپ کی فون کالز اور خط کا جواب دینے سے انکار ، ملاقات کی تازہ کوشش بھی ناکام، امریکی میڈیا

(ویب ڈیسک ) معروف امریکی اخبار 'وال اسٹریٹ جرنل' نے انکشاف کیا ہے کہ شمالی کوریا کے سپریم لیڈر کم جونگ اُن نے امریکی صدر ڈونلڈ ٹرمپ کی فون کالز اور ذاتی خط کا جواب دینے سے انکار کر دیا ہے، جبکہ رواں ہفتے دورہِ ایشیا کے موقع پر ٹرمپ کی جانب سے کم جونگ اُن سے ملاقات کی تازہ کوشش بھی ناکامی سے دوچار ہو گئی ہے۔

ٹرمپ کی فون کالز پر مکمل خاموشی اور خط پہنچانے کی ڈرامائی کوشش:

وال اسٹریٹ جرنل کے مطابق صدر ڈونلڈ ٹرمپ نے گزشتہ سال امریکا اور شمالی کوریا کے درمیان قائم شدہ خصوصی ٹیلی فون لائنز اور رابطہ چینلز کے ذریعے کم جونگ اُن سے رابطہ کرنے کی کوشش کی، تاہم دوسری جانب سے کسی نے جوابی کال نہیں کی۔

ذرائع کے مطابق اس کے بعد صدر ٹرمپ نے کم جونگ اُن کو ایک خط تحریر کیا لیکن سب سے بڑا مسئلہ یہ خط پیانگ یانگ تک پہنچانا تھا۔

وائٹ ہاؤس کے حکام نے ایک منصوبے کے تحت ایک گروپ کو مین ہٹن میں اقوامِ متحدہ کے لیے شمالی کوریا کے مستقل مشن کے دفتر کے باہر تعینات کیا، جس نے وہاں سے گزرنے والے ایک شمالی کوریائی سفارت کار کو لپک کر خط تھما دیا۔ تاہم بعد ازاں اقوامِ متحدہ کے ایک اجلاس میں اس سفارت کار نے وہ بغیر کھلا خط ایک امریکی نمائندے کے سامنے پھینک دیا۔

دورہِ ایشیا پر ملاقات کی آخری لمحات کی کوشش بھی ناکام:

رپورٹ کے مطابق رواں ہفتے ایشیا کے دورے کے موقع پر صدر ٹرمپ کی جانب سے کم جونگ اُن کے ساتھ ملاقات کی تازہ کوشش بھی ناکام ہو گئی۔

مذاکرات سے باخبر افراد کا کہنا ہے کہ دونوں فریقوں نے آخری لمحات میں آمنے سامنے بات چیت کے امکان کا جائزہ لیا، لیکن کم جونگ اُن نے ایسی کڑی شرائط رکھ دیں جنہیں امریکا قبول نہیں کر سکتا تھا۔

بڑھتا ہوا جوہری ذخیرہ اور کم جونگ اُن کا بدلا ہوا مؤقف:

واضح رہے کہ صدر ٹرمپ کے پہلے دورِ صدارت میں دونوں رہنماؤں کی 3 ملاقاتیں ہوئی تھیں جن کا محور جوہری ہتھیاروں کا خاتمہ تھا، مگر اب کم جونگ اُن نہ تو جوہری پروگرام ترک کرنے میں دلچسپی رکھتے ہیں اور نہ ہی ٹرمپ سے دوستی کے خواہاں ہیں۔

اخبار کے مطابق 2019 میں ٹرمپ سے آخری ملاقات کے بعد سے اب تک کم جونگ اُن کے جوہری ہتھیاروں کا ذخیرہ 20 سے 30 وار ہیڈز سے بڑھ کر اندازاً 60 جوہری وار ہیڈز تک پہنچ چکا ہے، جبکہ ان کے ٹھوس ایندھن والے بین البراعظمی بیلسٹک میزائل (ICBMs) امریکا تک مار کرنے کی صلاحیت رکھتے ہیں۔

امریکی انٹیلی جنس کے سالانہ خطرات کے جائزے میں بھی اعتراف کیا گیا ہے کہ کم جونگ اُن کا اپنے اسٹریٹجک ہتھیاروں پر سودے بازی کا کوئی ارادہ نہیں، اور وہ اب اس بات پر زور دے رہے ہیں کہ امریکا شمالی کوریا کو ایک جوہری طاقت کے طور پر تسلیم کرے۔

Watch Live Public News