اگر کوئی عدلیہ کا احترام نہیں کرتا تو ہم سے بھی امید نہ رکھے: چیف جسٹس لاہور ہائیکورٹ

ویب ڈیسک: چیف جسٹس لاہورہائیکورٹ نے ایک تقریب میں خطاب کرتے ہوئے کہا ہے کہ عدلیہ کسی کی بی ٹیم نہیں ہے۔ صرف اللہ تعالیٰ کو جوابدہ ہیں۔ عدالتوں کا تقدس برقرار رکھنا اور ہڑتال کلچر کا خاتمہ ان کی اولین ترجیح ہے۔انہوں نے واضح کیا کہ اگر کوئی عدلیہ کا احترام نہیں کرتا تو ہم سے بھی امید نہ رکھے۔

تفصیلات کے مطابق پنجاب جوڈیشل اکیڈمی میں منعقدہ تقریب سے خطاب کرتے ہوئے چیف جسٹس ملک شہزاد احمد خان کا کہنا تھا کہ پنجاب میں 14 لاکھ مقدمات، ججز کی کمی کا سامنا ہے، ہڑتالوں سے لوگ اپنے حقوق سے محروم ہو جاتے ہیں، مجھے یقین ہے کہ 90 فیصد وکلا اچھے لوگ ہیں، ان وکلا کا مشکور ہوں جنہوں نے ہڑتال کلچر کو ختم کرنے میں مدد کی۔

انہوں نے کہا کہ کوئی جج کسی پریشر میں نہ آئے، مجھ سمیت ہر جج کے دل میں وکیل کا احترام ہے، ہم کسی بار، کسی ادارے، کسی حکومت کے ساتھ لڑائی نہیں چاہتے، ہمارے دل میں سب کا احترام ہے، تالی دونوں ہاتھوں سے بجتی ہے، اگر کوئی عدلیہ کا احترام نہیں کرے گا تو ہم سے بھی توقع نہ رکھے، ہم پھر قانون کے مطابق چلیں گے۔

جسٹس ملک شہزاد احمد خان کا کہنا تھا کہ آپس کی لڑائی سے ادارے کمزور ہوتے ہیں، ان سے ہوشیار رہیں جو اداروں کو آپس میں لڑانا چاہتے ہیں۔

انہوں نے کہا کہ آزاد عدلیہ کے خواب کی تعبیر کیلئے سب کو اپنا اپنا حصہ ڈالنا ہے، یہ عدالتی نظام کسی طاقتور کیلئے نہیں کمزور کیلئے بنایا گیا ہے، طاقتور اپنا حق لے لیتا ہے لیکن مظلوم کو اس نظام میں آنے کی ضرورت پڑتی ہے، ہر پاکستانی شہری کو حق ہے کہ اس کو قانونی تحفظ حاصل ہو۔

چیف جسٹس لاہور ہائیکورٹ کا مزید کہنا کہ آپ اپنے دل میں صرف خوف خدا رکھیں گے، آپ عرش والے خدا کا خوف رکھیں گے اور فرشی خداؤں سے نہ ڈریں۔