ویب ڈیسک: وفاقی آئینی عدالت نے اپنی سردیوں کی تعطیلات کا شیڈول جاری کردیا ہے۔ عدالت 22 دسمبر 2025 سے 4 جنوری 2026 تک بند رہے گی، اور 5 جنوری 2026 سے دوبارہ سماعتیں شروع ہوں گی۔
سرکاری نوٹیفکیشن کے مطابق، تعطیلات کے دوران عدالت کے دفاتر کھلے رہیں گے اور اہم، پہلے سے طے شدہ مقدمات کی سماعت جاری رکھی جائے گی۔
یاد رہے کہ وفاقی آئینی عدالت کو 27ویں آئینی ترمیم کے تحت قائم کیا گیا تھا، تاکہ پاکستان کے عدالتی نظام کو مضبوط بنایا جا سکے اور آئینی حقوق کے تحفظ کو یقینی بنایا جا سکے۔ عدالت کا بنیادی مقصد آئین کی تشریح کرنا اور آئینی نوعیت کے قانونی تنازعات کو حل کرنا ہے۔
چیف جسٹس امین الدین خان کی سربراہی میں قائم اس عدالت کے دیگر ججز میں جسٹس حسن اظہر رضوی، جسٹس عامر فاروق، جسٹس علی باقر نجفی، جسٹس کریم خان آغا، جسٹس روزی خان بریچ،اور جسٹس ارشد حسین شاہ شامل ہیں۔
چیف جسٹس کا پیغام
وفاقی آئینی عدالت کی ویب سائٹ پر چیف جسٹس امین الدین خان نے کہا کہ "عدالت کا قیام پاکستان کے آئینی سفر میں ایک اہم سنگ میل ہے۔" انہوں نے مزید کہا کہ عدالت کا مینڈیٹ آئین کی وضاحت، آزادی اور دیانتداری کے ساتھ کرنا، بنیادی حقوق کا تحفظ کرنا، اور آئینی نظام کو تمام ریاستی اداروں کے لیے استحکام، انصاف اور توازن کا ذریعہ بنانا ہے۔