’ہم پر اس قدر ظلم ہورہا ہے جیسے یہ کشمیر یا فلسطین ہے‘

لاہور: سابق وزیر اعظم اور چیئرمین پاکستان تحریک انصاف (پی ٹی آئی) عمران خان کا کہنا ہے کہ ہم پر اتنا ظلم ہورہا ہے جیسے یہ کشمیر یا فلسطین ہے ۔ تفصیلات کے مطابق پی ٹی آئی چیئرمین عمران خان نے لاہور کی انسدادِ دہشت گردی عدالت میں صحافیوں سے گفتگو کرتے ہوئے کہا کہ مینار پاکستان جلسے کو ناکام بنانے کیلئے ہمارے 1600 کارکنان کو گرفتار کرلیا گیا ہے، میری عوام سے درخواست ہے کہ مینار پاکستان پہنچیں۔ انہوں نے کہا کہ یہ آج اپنے آنکھوں سے دیکھیں گے ملک کی تاریخ کا آج سب سے بڑا جلسہ ہوگا ، عوام گھروں سے نکلیں گے ، یہ ہم پر ظلم کررہے ہیں اور تحریک انصاف کو کچلنے کا ہر حربہ استعمال کررہے ہیں ۔

عمران خان سے انسدادِ دہشت گردی عدالت میں خصوصی گفتگو: #حقیقی_آزادی_جلسہ
pic.twitter.com/F3OHBrbYNL

— PTI (@PTIofficial) March 25, 2023

سابق وزیر اعظم کا کہنا تھا کہ جو قوم بڑی شان سے آزاد ہوئی تھی انہوں نے اس آزادی کو بالکل ختم کردیا ہے ، ہمارے لوگوں کو اغواء کررہے ہیں، ہم پر جو ظلم و تشدد ہورہا ہے جیسے یہ مقبوضہ کشمیر یا فلسطین ہے ، یہ جو بھی حربہ استعال کریں گے اس کا آج ردعمل آ جائے گا ۔ عمران خان کا مزید کہنا تھا کہ ہم دلدل میں پھنس رہے ہیں، لوگ آٹے کی لائنوں میں مر رہے ہیں ، آج لوگوں کو بتائیں گے کہ کس طرح ملک کو دلدل سے نکالیں گے ۔ انہوں نے کارکنوں سے کہا ہے کہ ظلم ہورہا ہے، لیکن یہ حقیقی آزادی کی جنگ و جہاد ہے جس میں قربانیاں دینی پڑیں گی، میں بھی تیار ہوں ، ہم کسی صورت پیچھے نہیں ہٹیں گے، خوف کی زنجیریں توڑنی ہی ہیں ۔