ویب ڈیسک:پاکستان تحریک انصاف ( پی ٹی آئی) نے سینیٹر سیف اللہ ابڑو کو پارٹی پالیسی کی خلاف ورزی پر شوکاز نوٹس جاری کردیا۔
پی ٹی آئی کی جانب سے سینیٹر سیف اللہ ابڑو کو پارٹی پالیسی کی خلاف ورزی اور چیئرمین پیپلز پارٹی بلاول بھٹو زرداری کے حق میں این اے 194 لاڑکانہ سے دستبرداری پر شوکاز نوٹس جاری کیا گیا۔
Show cause notice has been issued to Senator Saif Ullah Abro for violating party’s policy pic.twitter.com/vhn6oMN8KE
— PTI (@PTIofficial) January 26, 2024
واضح رہے کہ پاکستان پیپلزپارٹی کے چیئرمین بلاول بھٹو زرداری سے بلاول ہاؤس لاہور میں پاکستان تحریک انصاف کے سینیٹر سیف اللہ ابڑو نے جمعے کو ملاقات کی جس میں سیف اللہ ابڑو نے لاڑکانہ کی قومی اسمبلی کے حلقے این اے 194 سے بلاول بھٹو کے حق میں الیکشن دستبردار ہونے کا اعلان کیا۔
پی ٹی آئی کی جانب سے جاری نوٹس میں کہا گیا کہ پارٹی قیادت کے علم میں آیا ہے کہ آپ نے پارٹی پالیسی کی خلاف ورزی کی ہے۔
سیف اللہ ابڑو نے پاکستان پیپلز پارٹی چیئرمین و امیدوار بلاول بھٹو زرداری کے حق میں پارٹی کی طرف سے دیے گئے ٹکٹ سے دستبرداری کا اعلان کیا، وہ سینیٹ آف پاکستان میں پارٹی کے ٹکٹ پر سینیٹر منتخب ہوئے تھے۔
نوٹس میں کہا گیا کہ تحریک انصاف نے سیف اللہ ابڑو کو 2024 کے عام انتخابات میں حصہ لینے کے لیے پارٹی ٹکٹ سے نوازا تھا، پارٹی ڈسپلن کی سنگین خلاف ورزی کرنے پر سیف اللہ ابڑو کو شوکاز نوٹس دیا جاتا ہے۔
نوٹس میں مزید کہا گیا کہ سیف اللہ ابڑو پارٹی کو 3 دن کے اندر وضاحتی بیان جمع کرائیں، جواب نہ دینے کی صورت میں پارٹی پالیسی اور قواعد و ضوابط کے مطابق مزید کارروائی کی جائے گی۔