(ویب ڈیسک) سنی اتحاد کونسل میں شامل پاکستان تحریک انصاف کی پارلیمانی پارٹی میں اختلافات سامنے آگئے۔
ذرائع کے مطابق شہریار آفریدی کے استعفے سے متعلق بیان کے بعد27 سے زائد ممبران نے استعفوں پر مشاورت کی جبکہ شاندانہ گلزار اور شیرافضل مروت سمیت متعدد ممبران نے پارٹی قیادت کی نااہلی پراحتجاج بھی کیا۔
ذرائع کا کہنا ہے کہ پی ٹی آئی ارکان اسمبلی نے اختلافات کی وجہ سے پارلیمانی پارٹی اجلاسوں میں شرکت سےمعذرت کی اور رہنماؤں نے شکوہ کیا کہ سینیٹ میں پارلیمانی لیڈر اور قومی اسمبلی میں سینیئر قیادت کمیٹیوں کےلیے کمپرومائزڈ ہے۔
ذرائع نے بتایاکہ ارکان کا مؤقف ہے کہ بانی پی ٹی آئی اور رہنماؤں کی رہائی کی بجائے قیادت عہدوں کے لئے کوشاں ہے۔
ذرائع کے مطابق پی ٹی آئی کے 21 ارکان اسمبلی نے اپنا الگ گروپ بنانے کا عندیہ دے دیا اور پارٹی چیئرمین بیرسٹرگوہر اور جنرل سیکرٹری عمرایوب خان کو سنجیدہ کوشش کرنے کا پیغام بھجوایا۔
قومی اسمبلی میں اپوزیشن لابی میں مولانا فضل الرحمان اورمحمود اچکزئی نے پی ٹی آئی ممبران سے ملاقات کی،مولانا فضل الرحمان نے معاملات جذبات کے بجائے افہام وتفہیم سے آگے بڑھانے کا کہا۔
مولانا فضل الرحمان اورمحمود اچکزئی کی مداخلت کے بعد شہریارآفریدی نے معاملات بہترکرنے کا کہا اور وقتی طور پر استعفے سے پیچھے ہٹنے کا فیصلہ کیا،پی ٹی آئی کی سینیئرقیادت نے اراکین سے بانی کی رہائی تک اختلاف پرخاموش رہنے کی استدعا کی۔