پبلک نیوز: خصوصی سرمایہ کار ی سہولت کونسل (SIFC)کی کوششوں سے آئی ٹی(IT) برآمدات میں ریکارڈ اضافہ ہوا ہے۔
اعداد وشمار کی رپورٹ کے مطابق گزشتہ ماہ مارچ میں پاکستان کی آئی ٹی (IT) برآمدات بڑھ کر 306 ملین ڈالر کی بلند ترین سطح پر پہنچ گئیں، سال 2024ء کے ابتدائی 9 ماہ میں آئی ٹی (IT) برآمدات مجموعی طور پر 2.28 بلین ڈالر تھیں جو کہ سالانہ 17 فیصد اضافہ بنتا ہے۔
رپورٹ میں بتایا گیا کہ مالی سال 2024 ء کے آغاز میں آئی ٹی (IT) برآمدات 2.28 بلین ڈالر تھیں جن میں مارچ 2024ء کے دوران 275 ملین ڈالر کا اضافہ ہوا جو 37 فیصد بنتا ہے۔
ذرائع کا کہنا ہے کہ آئی ٹی اور ٹیلی کام سیکٹر خصوصی سرمایہ کاری سہولت کونسل (SIFC) کے دائرے میں آنے والے کلیدی شعبوں میں سے ایک اہم شعبہ ہے، آئی ٹی سیکٹر میں اس ترقی کا سہرا خصوصی سرمایہ کاری سہولت کونسل (SIFC) کے ذریعے کی جانے والی ٹھوس کوششوں کے سر جاتا ہے ، خصوصی سرمایہ کاری سہولت کونسل (SIFC) کی کوششوں سے اس سیکٹر میں اہم مراعات دی گئیں۔
علاوہ ازیں مراعات میں سٹیٹ بینک آف پاکستان (SBP) کے ذریعے ڈالر کی برقراری میں اضافے کے علاوہ، سرمایہ کاری کے ماحول کو بہتر بنانے کے لیے دیگر اقدامات بھی شامل ہیں۔
واضح رہے وزارت خزانہ نے دعویٰ کیا ہے کہ مالی سال 2024 کے دوران آئی ٹی (IT) کی برآمدات 3.5 بلین ڈالر تک بڑھ جائیں گی۔