ویب ڈیسک: مودی کے دور حکومت میں بھارت میں ظالم طاقتور، انصاف ناپید اور غریب بے بس ہو گیا۔ ظالم مودی کی زیرِ اقتدار بھارت میں کسان معاشی دباؤ کے ساتھ ساتھ سیاسی جبر کا بھی شکار ہیں۔ مدھیہ پردیش میں بی جے پی لیڈر کی جانب سے کسان کو جیپ تلے کچلنا کسانوں پر تشدد کی تازہ مثال ہے۔
بھارتی جریدے انڈیا ٹو ڈے کی رپورٹ کے مطابق مدھیہ پردیش کے گاؤں گنیش پورہ میں بی جے پی رہنما نے زمین بیچنے سے انکار پر کسان پر جیپ چڑھا کر قتل کر دیا۔ مہندرا نگر نے ساتھیوں کیساتھ ملکر رام سواروپ کو ڈنڈوں سے مارا، خواتین پر بدترین تشدد کیا اور گولیاں چلائیں۔ اسلحہ کے زور پر زخمی کسان کو ہسپتال لے جانے کی اجازت بھی نہیں دی گئی۔
گنیش پورہ کے مقامی افراد نے بتایا کہ بی جے پی رہنماؤں نے ڈرا دھمکا کر 25 کسانوں کو زبردستی سستے داموں زمین بیچنے اور گاؤں چھوڑنے پر مجبور کیا۔
کانگریسی ایم ایل اے رشی اگروال نے مودی حکومت پر تنقید کرتے ہوئے کہا کہ بی جے پی انتظامیہ کی سرپرستی میں مدھیہ پردیش میں تشدد، لوٹ مار اور عصمت دری کے واقعات بڑھ گئے۔ مودی سرکار کی ناکام پالیسیوں نے بھارت کے کسانوں کو قرض، بھوک اور خودکشیوں پر مجبور کر دیا ہے۔