ویب ڈیسک: وزیراعلیٰ خیبرپختونخوا علی امین گنڈا پور نے کہا ہے کہ گولیاں، آنسو گیس اور تشدد ہمیں مقصد سے نہیں ہٹا سکتا، جہاں حکم ملا جلسہ کریں گے۔
تفصیلات کے مطابق پشاور میں میڈیا سے گفتگو کرتے ہوئے وزیر اعلیٰ خیبرپختونخوا علی امین گنڈا پور کا کہنا تھا کہ پنجاب حکومت کا شور بتاتا ہے کہ انہیں ہمارے آنے سے تکلیف ہوئی ہے، انہیں بہت ٹف ٹائم دینے والا ہوں، فارم 47 والوں سے جان نہ چھوٹی تو انہیں چھوڑونگا نہیں، ہم عاجز لوگ ہیں ،حق کے ساتھ کھڑے ہیں۔
انہوں نے کہا کہ دلوں میں چوری رکھنے والے ڈر رہے ہیں، انہیں پتا ہے ان کا وقت قریب آگیا ہے، ہم ایک ایسا نظام لانے والے ہیں جس میں پبلک سیفٹی پروٹیکشن لازمی ہوگی، قانون میں رہ کر ہی کوئی کارروائی کرسکتا ہے، کوئی قانون سے بالاتر نہیں۔
علی امین گنڈاپور کا کہنا تھا کہ یہ جلسے کیلئے این او سی دے کر بھی جو حال کرتے ہیں وہ آپ نے دیکھا ہے، یہ فارم 47 پر آئی ہوئی حکومتیں ہیں، یہ پاکستان کی جمہوریت کا نقصان نہیں کررہے بلکہ انہوں نے ملک سے جمہوریت کو ختم ہی کردیا ہے، ہم پرامن احتجاج کریں گے، جہاں جہاں حکم ملا ہے وہاں جائیں گے، کردار ادا کریں گے۔
وزیراعلیٰ خیبرپختونخوا نے کہا کہ یہ گولیاں ،آنسو گیس اور تشدد ہمیں اپنے مقصد سے ہٹا نہیں سکتا، پاکستان میں جمہوریت ہمارا نظریہ ہے، بانی پی ٹی آئی بے گناہ جیل میں ہیں ،ان پر کوئی کیس نہیں، ہماری پارٹی کی خواتین جیل میں ہیں، ہم اپنے نظریے سے پیچھے نہیں ہٹیں گے۔
ان کا کہنا تھا کہ میں صوبے کا وزیراعلیٰ ہوں ڈنکے کی چوٹ پر سرکاری مشینری استعمال کروں گا کسی کا باپ بھی نہیں روک سکتا اگر میں جلسے میں بی آر ٹی بسیں لے کر جاتا تو یہ لوگ کہتے کہ صوبے کے وسائل استعمال ہورہے ہیں، میں اپنے ساتھ پرائیویٹ گاڑیاں اور ذاتی گاڑیاں لے کر جاتا ہوں، گاڑیوں میں پٹرول اور ڈیزل جیب سے ڈلواتا ہوں۔سرکاری وسائل کا غیر قانونی استعمال تو پنجاب حکومت کرتی ہے۔
علی امین گنڈاپور نے وارننگ دیتے ہوئے کہا کہ پنجاب پولیس دوبارہ ایسا نہ کرے،اس مرتبہ اپنے کارکنوں سے بچایا اسکے بعد میں خود انہیں پکڑ کر یہاں لاونگا،ادارے ظلم و زیادتیوں پر نظریں بند نہ کریں۔دوہزار سترہ کے پولیس ایکٹ پر کام کررہے ہیں،نگران حکومت میں پولیس پر وہ کام کروائے گئے جو وہ نہیں کرنا چاہتے تھے۔پنجاب پولیس کے اہلکاروں فیملز کا احساس کیا ہے،کسی کا غلط حکم نہ مانیں ،نتائج آپ نے خود بھگتنے ہونگے۔
انہوں نے کہا کہ عظمی بخاری کہتی ہے میں خیبر پختونخوا میں جلسہ کروں،میں کیوں یہاں جلسہ کروں ،پورے پاکستان میں جلسہ کرونگا،بلاول ،مولانا ،پی ڈی ایم اور دیگر جلسے کررہے ہیں انھیں کوئی روکنے والا نہیں۔
علی امین گنڈاپور نے مزید کہا کہ مولانا صاحب آپ نے بہت دیر کردی،آپ کے دلوں میں جو راز ہیں وہ بتادیں،مولانا صاحب آپ نے کہا تھا بانی پی ٹی آئی عمران خان کی حکومت امریکا کے کہنے پر گرائی،مولانا صاحب آج مان گئے ہیں۔