(ویب ڈیسک) سعودی عرب کے شہر طائف میں واقع گرین ماؤنٹین پارک میں ایک تفریحی جھولا ٹوٹنے کے نتیجے میں 23 افراد زخمی ہو گئے، جن میں سے بعض کی حالت تشویشناک بتائی جا رہی ہے۔
خلیج ٹائمز کی رپورٹ کے مطابق، حادثہ اس وقت پیش آیا جب پارک میں نصب ایک بڑا جھولا، جس پر خواتین، مرد اور بچے سوار تھے، اچانک دو ٹکڑوں میں تقسیم ہو گیا۔ واقعے کی خوفناک ویڈیو سوشل میڈیا پر وائرل ہو چکی ہے، جس میں دیکھا جا سکتا ہے کہ جھولا ہوا میں جھولتے ہوئے اچانک گر جاتا ہے، اور سوار افراد زور دار دھماکے کے ساتھ زمین پر آ گرتے ہیں۔
سعودی عرب میں بھی جھولے ناقص ہیں، طائف میں ایمیوزمنٹ پارک کا 360 رائیڈ جھولا اچانک زمین پر گر گیا، 23 افراد زخمی ہو گئے، 3 کی حالت تشویشناک۔۔!!pic.twitter.com/xXJHYLjwZN
— Khurram Iqbal (@khurram143) July 31, 2025
واقعے کے فوری بعد ریسکیو ٹیمیں موقع پر پہنچیں اور زخمیوں کو قریبی اسپتال منتقل کیا گیا۔ اطلاعات کے مطابق زخمیوں میں سے تین افراد کی حالت نازک ہے، جبکہ دیگر کو ابتدائی طبی امداد دی جا چکی ہے۔
مقامی حکام نے جھولے کے ٹوٹنے کی تحقیقات شروع کر دی ہیں اور پارک کو عارضی طور پر بند کر دیا گیا ہے۔
ابتدائی اطلاعات کے مطابق جھولے کی فنی خرابی حادثے کی وجہ بنی، تاہم مکمل حقائق تحقیقات کے بعد ہی سامنے آئیں گے۔