عمران خان سمیت کسی قیدی میں ہیپاٹائٹس کی تشخیص نہیں ہوئی،سپرنٹنڈنٹ اڈیالہ جیل

ویب ڈیسک: اڈیالہ جیل راولپنڈی کے سپرنٹنڈنٹ عبدالغفور انجم نے بانی پی ٹی آئی عمران خان کے صاحبزادے قاسم خان کے حالیہ بیان پر وضاحت دیتے ہوئے کہا ہے کہ جیل میں ہیپاٹائٹس سے متاثرہ کوئی قیدی موجود نہیں ہے۔

اپنے جاری کردہ بیان میں سپرنٹنڈنٹ کا کہنا تھا کہ جیل میں موجود تمام قیدیوں کے طبی معائنے باقاعدگی سے کیے جاتے ہیں، جن میں ہیپاٹائٹس بی، سی اور ایچ آئی وی جیسے ٹیسٹ بھی شامل ہوتے ہیں۔ ان کے مطابق حالیہ میڈیکل معائنے کے نتائج کی روشنی میں جیل میں کسی بھی قیدی میں ہیپاٹائٹس کی تشخیص نہیں ہوئی۔

انہوں نے مزید کہا کہ جیل انتظامیہ قیدیوں کی صحت کے حوالے سے سخت پالیسی پر عمل پیرا ہے، اور اگر کسی قیدی میں کسی قسم کی وائرل یا متعدی بیماری کی علامات پائی جائیں تو اسے فوری طور پر باقی قیدیوں سے علیحدہ کر کے علاج معالجہ فراہم کیا جاتا ہے۔

یہ وضاحت اس وقت سامنے آئی جب بانی پی ٹی آئی عمران خان کے بیٹے قاسم خان نے ایک انٹرویو میں دعویٰ کیا تھا کہ اڈیالہ جیل میں ہیپاٹائٹس کی وجہ سے 10 قیدی ہلاک ہو چکے ہیں، اور انہیں خدشہ ہے کہ ان کے والد بھی اس بیماری کی زد میں آ سکتے ہیں۔

سپرنٹنڈنٹ اڈیالہ جیل نے قاسم خان کے بیان کو بے بنیاد قرار دیتے ہوئے کہا کہ جیل میں قیدیوں کی صحت کا باقاعدہ ریکارڈ موجود ہے، اور اگر کسی بیماری کی شکایت ہو تو فوری اقدامات کیے جاتے ہیں۔ انہوں نے واضح کیا کہ افواہوں سے عوام کو گمراہ کرنا مناسب عمل نہیں۔

اس بیان کے بعد قیدیوں کی صحت اور جیلوں میں بنیادی سہولیات کے حوالے سے نئی بحث کا آغاز ہو گیا ہے، جبکہ جیل انتظامیہ نے شفافیت اور احتیاطی تدابیر پر زور دیا ہے۔