ویب ڈیسک: روس کے شہر سینٹ پیٹرزبرگ میں آسمان پر ایک غیر معمولی فلکیاتی منظر دیکھنے میں آیا، جہاں چاند کے ساتھ مزید تین روشن عکس نمودار ہوئے، جس سے ایسا محسوس ہوا جیسے آسمان پر ایک ہی وقت میں چار چاند موجود ہوں۔ اس حیران کن منظر کی ویڈیوز اور تصاویر سوشل میڈیا پر تیزی سے وائرل ہو گئیں۔
غیر ملکی خبر رساں ایجنسی کے مطابق شہریوں نے آسمان پر اصل چاند کے اردگرد کئی روشن گول دائروں کو دیکھا، جس نے دیکھنے والوں کو حیرت میں مبتلا کر دیا۔ اس نایاب منظر کو روس کے سرکاری خبر رساں ادارے آر ٹی نے بھی اپنے سوشل میڈیا پلیٹ فارمز پر شیئر کیا۔
ماہرین فلکیات کے مطابق اس مظہر کو سائنسی اصطلاح میں ’ پیراسیلین‘ کہا جاتا ہے، جسے عام زبان میں ’فرضی چاند‘ یا ’ مون ڈاگ‘ بھی کہا جاتا ہے۔ یہ مظہر اس وقت تشکیل پاتا ہے جب سرد موسم میں چاند کی روشنی فضا میں موجود ننھے برفانی ذرات سے گزرتی ہے، جو روشنی کو مخصوص زاویے پر موڑ دیتے ہیں اور چاند کے اطراف اضافی روشن دھبے دکھائی دینے لگتے ہیں۔
A rare phenomenon — a “paraselene” — was observed overnight over Moscow and the surrounding region
— NEXTA (@nexta_tv) January 31, 2026
A paraselene, an optical illusion in which multiple Moon disks appear, occurs when light from the real Moon is refracted by flat ice crystals high in the atmosphere above the… pic.twitter.com/mRfzRu1Ilb
فلکیاتی ماہرین کا کہنا ہے کہ پیراسیلین عموماً اصل چاند سے تقریباً 22 ڈگری یا اس سے زیادہ فاصلے پر ظاہر ہوتے ہیں اور یہ اصل چاند کے مقابلے میں قدرے مدھم ہوتے ہیں۔ یہ منظر اس وقت زیادہ واضح ہوتا ہے جب چاند افق کے قریب ہو۔
فلکیاتی ادارے ’اسکائی بریری‘ کے مطابق یہ روشن عکس ہمیشہ چاند کی ہی سطح پر افق کے اوپر دکھائی دیتے ہیں، جبکہ ان کی شکل اور جسامت کا انحصار بادلوں میں موجود برفانی ذرات کے زاویے اور حرکت پر ہوتا ہے۔ بعض اوقات بڑے برفانی ذرات روشنی کے لمبے ستون بھی بنا دیتے ہیں، جو منظر کو مزید دلکش بنا دیتے ہیں۔
اگرچہ پیراسیلین کا تعلق دن کے وقت نظر آنے والے ’سن ڈاگز‘ سے ہوتا ہے، تاہم ایک ہی وقت میں متعدد فرضی چاند نظر آنا انتہائی کم ہوتا ہے۔ ماہرین کے مطابق سینٹ پیٹرزبرگ میں نظر آنے والا یہ منظر اسی وجہ سے منفرد قرار دیا جا رہا ہے۔
ماہرین کا کہنا ہے کہ ایسے مظاہر اس بات کی یاد دہانی ہیں کہ مخصوص موسمی اور فضائی حالات کس طرح ایک عام رات کو غیر معمولی اور یادگار بنا سکتے ہیں۔ اس نایاب منظر کو اپنی آنکھوں سے دیکھنے والے افراد کے لیے یہ لمحہ یقیناً حیرت اور مسرت کا باعث بنا۔