ویب ڈیسک: انگلینڈ کے نوجوان فاسٹ بولر جان ٹرنر نے مسلسل انجریز کے باعث صرف 25 سال کی عمر میں پروفیشنل کرکٹ سے اچانک ریٹائرمنٹ کا اعلان کر دیا، جس کے ساتھ ہی ان کا پانچ سالہ پیشہ ورانہ کیریئر اختتام پذیر ہو گیا۔
جان ٹرنر نے 2024 میں انگلینڈ کی جانب سے 2 ون ڈے انٹرنیشنل اور 2 ٹی ٹوئنٹی انٹرنیشنل میچز میں شرکت کی۔ تاہم گزشتہ سال جون میں کمر میں اسٹریس فریکچر کی انجری کے بعد وہ کسی بھی پیشہ ورانہ میچ میں میدان میں واپس نہ آ سکے۔
معاشیات میں گریجویشن کرنے والے جان ٹرنر کا کاؤنٹی کلب ہیمپشائر کے ساتھ معاہدہ مزید دو سال کے لیے باقی تھا، جبکہ گزشتہ سال کے اختتام تک وہ انگلینڈ اینڈ ویلز کرکٹ بورڈ (ECB) کے ڈویلپمنٹ کنٹریکٹ کا بھی حصہ تھے۔
ریٹائرمنٹ کا اعلان کرتے ہوئے جان ٹرنر نے کہا کہ زندگی کے اگلے مرحلے کی جانب بڑھنے کا یہی مناسب وقت ہے۔ ان کے مطابق مسلسل انجریز، بالخصوص وہ اسٹریس فریکچر جس نے انہیں ایک سال سے زائد عرصے تک کرکٹ سے دور رکھا، نے انہیں اپنے کھیل اور مستقبل کے بارے میں سنجیدگی سے سوچنے پر مجبور کیا۔
انہوں نے کہا، "پروفیشنل اور بین الاقوامی کرکٹ کھیلنا ہمیشہ میرا خواب تھا، جبکہ ہیمپشائر اور انگلینڈ کی نمائندگی کرنا میرے بچپن کے خوابوں کی تعبیر تھی۔ کرکٹ سے ریٹائرمنٹ کا فیصلہ میری زندگی کے مشکل ترین فیصلوں میں سے ایک ہے، لیکن مجھے یقین ہے کہ یہ میرے لیے درست فیصلہ ہے۔"
جان ٹرنر نے 2021 میں ہیمپشائر کی جانب سے فرسٹ کلاس کرکٹ میں ڈیبیو کیا تھا۔ انہوں نے کلب کے ساتھ گزارے گئے پانچ برسوں کو اپنی زندگی کا یادگار ترین دور قرار دیتے ہوئے انتظامیہ، کوچنگ اسٹاف، ساتھی کھلاڑیوں اور مداحوں کی مسلسل حمایت اور اعتماد پر ان کا شکریہ ادا کیا۔