ویب ڈیسک: فیفا ورلڈ کپ 2026 کے فائنل میں اسپین کے ہاتھوں شکست کے ساتھ دفاعی چیمپیئن ارجنٹینا کے نام ایک ناپسندیدہ ریکارڈ بھی درج ہو گیا۔
لیونل میسی کی قیادت میں میدان میں اترنے والی ارجنٹینا کی ٹیم مقررہ 90 منٹ کے دوران گول پر ایک بھی شاٹ نہ لگا سکی، جو ورلڈ کپ فائنلز کی تاریخ میں پہلی بار ہوا ہے۔
نیو جرسی اسٹیڈیم میں کھیلے گئے سنسنی خیز مقابلے میں اسپین نے ابتدا سے ہی جارحانہ کھیل پیش کیا اور ارجنٹینا کے دفاع پر مسلسل دباؤ برقرار رکھا۔ ہسپانوی ٹیم نے گول کی جانب 15 شاٹس لگائے، جن میں 9 شاٹس ہدف پر تھے، جبکہ ارجنٹینا کا اٹیک مکمل طور پر بے اثر رہا۔
اعداد و شمار کے مطابق ورلڈ کپ فائنل کی تاریخ میں یہ پہلا موقع ہے کہ کسی ٹیم نے مقررہ وقت میں گول پر ایک بھی شاٹ نہ لگایا ہو، یوں ارجنٹینا کے نام ایک ایسا منفی ریکارڈ بھی درج ہو گیا جسے وہ بھلانا چاہے گا۔
میچ کا واحد اور فیصلہ کن گول اسپین کے فیرن ٹوریس نے اضافی وقت کے دوسرے ہاف میں اسکور کیا، جس کی بدولت اسپین نے 1-0 سے کامیابی حاصل کرتے ہوئے 16 سال بعد دوسری بار فیفا ورلڈ کپ کا ٹائٹل اپنے نام کر لیا، جبکہ ارجنٹینا اپنے عالمی اعزاز کا دفاع کرنے میں ناکام رہا۔