ویب ڈیسک : امریکی سفیر ڈونلڈ بلوم نے وفد کے ہمراہ تاریخی چوکنڈی قبرستان کا دورہ کیا ہے ۔
چوکنڈی پہنچنے پرصوبائی وزیر ثقافت و سیاحت سید ذوالفقار علی شاہ نے امریکی سفیر ڈونلڈ بلوم و وفد کا استقبال کیا۔وفد میں قائمقام قونصل جنرل جمی مولڈین، ہیتھر مرفی، زہرا حاجیانی، نریندر کمار و دیگر شریک تھے۔
صوبائی وزیر سید ذوالفقار علی شاہ نے امریکی سفیر ڈونلڈ بلوم کو چوکنڈی قبرستان کی قدیم تاریخی حیثیت سے متعلق آگاہ کیا۔
اس موقع پر امریکی سفیر ڈونلڈ بلوم کا کہنا تھا کہ تاریخی چوکنڈی قبرستان کا دورہ متاثر کن ہے۔ چوکنڈی کا قبرستان فنکارانہ مہارت اور نقش ونگاری کے کام کا اعلیٰ نمونہ ہے جبکہ اس کی تاریخی حیثیت اور پاکستان کے اہم قبرستانوں میں منفرد طرز تعمیر میں اپنی مثال آپ ہے۔
انہوں نے چوکنڈی کے مقبروں کی تعمیراتی ترتیب اور اس کے طرز تعمیر پر ان کے معماروں کی کاری گری و ہنرمندی کو قابل داد ہ قراردیا اور کہا کہ چوکنڈی و دیگر تاریخی مقامات کو مزید اجاگر کرنے کے لیے یونیسکو کے تحت بھر پور تعاون کریں گے۔
اس موقع پر امریکی سفیر ڈونلڈ بلوم کا کہنا تھا کہ پاکستان اور امریکا کے درمیان مضبوط و دیرینہ تعلقات ہیں۔دونوں ممالک کے درمیان سیاحتی تعلقات مزید مستحکم کرنے کی ضرورت ہے۔سیاحوں کے لیے امریکی ویزہ کے حصول میں آسانیاں پیدا کریں گے۔
سید ذوالفقار علی شاہ وزیرثقافت سندھ کا کہنا تھا کہ سیاحتی و ثقافتی ورثوں کو محفوظ بناکر سیاحوں کو سازگار ماحول فراہم کررہے ہیں۔سیاحوں کو تمام تر سہولیات فراہم کرنے کے لیے اقدامات کررہے ہیں۔چیئرمین بلاول بھٹو زرداری کی خواہش ہے کہ سندھ کی سیاحت و ثقافت کے ذریعے پاکستان کا نام دنیا بھر میں روشن ہو،۔
صوبائی وزیر سید ذوالفقار علی شاہ نے مہمانوں کو سندھی روایتی اجرک اور موہن جو دڑو کے نوادرات کی نقول بطور تحفہ پیش کیے۔
دورے کے دوران سیکرٹری کلچر خالد چاچڑ، ایم ڈی سیاحت سید فیاض شاہ، ڈی جی نوادرات عبدالفتاح شیخ و دیگر افسران بھی موجود تھے۔