ویب ڈیسک: وفاقی وزیر دفاع خواجہ آصف سے منسوب ایک ویڈیو سوشل میڈیا پر تیزی سے وائرل ہورہی ہے، تاہم سرکاری فیکٹ چیک کے مطابق ویڈیو میں موجود آڈیو جعلی اور مصنوعی ذہانت (AI) کی مدد سے تیار کی گئی ہے۔
سوشل میڈیا پر گردش کرنے والی تقریباً ایک منٹ کی ویڈیو میں بظاہر خواجہ آصف کو پریس کانفرنس کرتے دکھایا گیا ہے، جبکہ آڈیو کے ذریعے یہ تاثر دیا گیا کہ وہ پاکستان اور بھارت کی معاشی و سیاسی صورتحال کا موازنہ کررہے ہیں۔
ویڈیو میں موجود جعلی آڈیو میں دعویٰ کیا گیا کہ دونوں ممالک نے ایک ہی وقت میں آزادی حاصل کی، تاہم بھارت نے ٹیکنالوجی، انفراسٹرکچر اور معیشت کے شعبوں میں ترقی کی جبکہ پاکستان پیچھے رہ گیا۔
وزارت اطلاعات و نشریات نے اپنے آفیشل ایکس اکاؤنٹ پر فیکٹ چیک جاری کرتے ہوئے ویڈیو کو مکمل طور پر جعلی قرار دیا ہے۔
This news is FAKE and the voice in video is AI generated.
— Ministry of Information & Broadcasting (@MoIB_Official) August 24, 2026
Defense Minister Khawaja Asif has not given any such statement.
Please verify news from official sources before sharing. pic.twitter.com/onWtFsiYkK
وزارت کے مطابق ویڈیو میں استعمال ہونے والی آواز خواجہ آصف کی نہیں بلکہ کمپیوٹر سافٹ ویئر اور آڈیو کلوننگ ٹیکنالوجی کے ذریعے تیار کی گئی ہے۔
فیکٹ چیک کے مطابق خواجہ آصف نے ایسا کوئی بیان یا پریس کانفرنس نہیں کی۔ وائرل ویڈیو دراصل ایک پرانی پریس کانفرنس کی فوٹیج پر مصنوعی آڈیو لگا کر تیار کی گئی ہے۔
حکام نے شہریوں کو سوشل میڈیا پر وائرل ہونے والی ایسی ویڈیوز شیئر کرنے سے قبل ان کی صداقت کی تصدیق کرنے کی ہدایت کی ہے۔